இளம்பெண்ணை ஓங்கி அறைந்த ராபிடோ பைக் டிரைவர்.. அதிர்ச்சி வீடியோ வைரல்..!

பெங்களூரு ஜெயநகரில் ஒரு ராபிடோ பைக் டாக்ஸி ஓட்டுநர், பெண் பயணியை தாக்கும் அதிர்ச்சி வீடியோ சமூக வலைத்தளங்களில் பரவி, பைக் டாக்ஸி சேவைகளின் எதிர்காலம் குறித்த கேள்விகளை எழுப்பியுள்ளது.

நகைக்கடையில் பணிபுரியும் ஒரு பெண், பயணத்தின் நடுவில் இறங்கியதும் ஓட்டுநரின் அலட்சிய ஓட்டுதலைக் கண்டித்துள்ளார். ஆங்கிலம் மட்டுமே பேசிய அப்பெண்ணுக்கும், கன்னடம் பேசிய ஓட்டுநருக்கும் இடையே மொழித்தடை காரணமாக வாக்குவாதம் முற்றியது. பெண் கட்டணம் செலுத்த மறுத்து, ஹெல்மெட்டை திருப்பி கொடுக்காததால், ஓட்டுநர் அவரை அறைந்து தரையில் தள்ளியுள்ளார். இந்தச் சம்பவம் வீடியோவில் பதிவாகியுள்ளது.

அதிர்ச்சியூட்டும் வகையில், வாக்குவாதத்தின்போதும், தாக்குதலின்போதும் அருகில் இருந்தவர்கள் யாரும் தலையிடவில்லை. காவல்துறை, அப்பெண்ணை FIR பதிவு செய்ய வலியுறுத்தியும், அவர் விரும்பாததால் Non-Cognizable Report பதிவு செய்து விசாரித்து வருகின்றனர்.

இதற்கிடையே, கர்நாடக உயர் நீதிமன்றம் இருசக்கர வாகன டாக்ஸிகளுக்கு தடை விதிக்க உத்தரவிட்டுள்ளதால், பைக் டாக்ஸிகள் சாலைகளில் இருந்து காணாமல் போகும் நிலை ஏற்பட்டுள்ளது. கர்நாடக போக்குவரத்து அமைச்சர் ராமலிங்க ரெட்டி, நீதிமன்றம் 12 வார கால அவகாசம் அளித்த நிலையில், நிறுவனங்கள் உத்தரவை பின்பற்ற வேண்டும் என தெரிவித்தார்.

Edited by Siva