லார்ட்ஸ் டெஸ்ட்டின் ஐந்தாவது நாளின் போது வீரர்களை கோலி உற்சாகப்படுத்தி பேசிய கோலியின் வீடியோ வைரலாகி வருகிறது.
லண்டன் லார்ட்ஸ் மைதானத்தில் இங்கிலாந்துக்கு எதிரான இரண்டாவது டெஸ்ட் போட்டியில் இந்திய அணி 151 ரன்கள் வித்தியாசத்தில் மிக அபாரமாக வெற்றி பெற்று வரலாற்று சாதனைப் படைத்துள்ளது. இந்த போட்டிக்குப் பிறகு பேசிய இந்திய அணி கேப்டன் கோலி இதுதான் எங்களின் சுதந்திர தினப் பரிசு எனக் கூறியுள்ளார்.
மேலும் அவர் ‘எங்கள் அணி குறித்து மிகவும் பெருமைப் படுகிறேன். போட்ட திட்டத்தின் படி விளையாடினோம். முதல் 3 நாட்களில் பிட்ச் பெரிதாக உதவவில்லை. ஆனால் பூம்ராவும் ஷமியும் விளையாடியது அபாரம். ஒரு நாள் தாமதமானாலும் இதுதான் எங்கள் சுதந்திர தினப் பரிசு’ எனக் கூறி இருந்தார்.
இந்நிலையில் ஐந்தாவது நாளின் இந்திய வீரர்கள் பீல்டிங் செய்யவந்த போது கோலி அணி வீரர்களிடம் பேசும்போது ‘எஞ்சிய 60 ஓவர்களும் அவர்களுக்கு நரகமாக இருக்க வேண்டும்’ எனக் கூறிய வீடியோ இணையத்தில் வைரலாகியுள்ளது.
