சுப்மன் கில் அபார இரட்டை சதம்.. இந்திய பவுலர்கள் அசத்தல்.. இந்தியா - இங்கிலாந்து டெஸ்ட் ஸ்கோர் விபரம்..!

இந்தியா மற்றும் இங்கிலாந்து அணிகளுக்கு இடையிலான இரண்டாவது டெஸ்ட் கிரிக்கெட் போட்டி விறுவிறுப்பாக நடைபெற்று வருகிறது. இந்த போட்டியில் சுப்மன் கில்லின் அபார இரட்டை சதம், இந்திய அணியை வலுவான நிலைக்கு கொண்டுசெல்ல, இங்கிலாந்து தனது முதல் இன்னிங்ஸில் விக்கெட்டுகளை இழந்து தடுமாறி வருகிறது. இந்திய பந்துவீச்சாளர்களின் ஆவேசமான பந்துவீச்சு இங்கிலாந்து பேட்ஸ்மேன்களை கட்டுப்படுத்தியுள்ளது.

நேற்றைய இரண்டாவது நாள் ஆட்டத்தில், இளம் வீரர் ஜெய்ச்வால் 87 ரன்களில் ஆட்டமிழந்தாலும், கேப்டன் சுப்மன் கில் அபாரமாக விளையாடி, 269 ரன்கள்  குவித்தார். இதில் 30 பவுண்டரிகள் மற்றும் மூன்று சிக்ஸர்கள் அடங்கும் என்பது குறிப்பிடத்தக்கது. கில்லுக்கு இணையாக ஆல்ரவுண்டர் ரவீந்திர ஜடேஜாவும் தனது அதிரடி ஆட்டத்தை வெளிப்படுத்தி, 10 பவுண்டரிகள் மற்றும் ஒரு சிக்ஸருடன் 89 ரன்கள் அடித்தார். இறுதியில், இந்திய அணி தனது முதல் இன்னிங்ஸில் 151 ஓவர்களில் 587 ரன்கள் குவித்து வலுவான முன்னிலை பெற்றது.

இந்தியாவின் பிரம்மாண்டமான ஸ்கோரை தொடர்ந்து, தனது முதல் இன்னிங்ஸை தொடங்கிய இங்கிலாந்து அணி அடுத்தடுத்து மூன்று விக்கெட்டுகளை இழந்து திணறி வருகிறது. தொடக்க ஆட்டக்காரர்கள் கிராளி 19 ரன்களில் ஆட்டமிழந்த நிலையில் பென் டக்கெட் மற்றும் போப் ஆகிய இருவரும் அடுத்தடுத்த பந்துகளில் ஆகாஷ் தீப்பின் பந்துவீச்சில் அவுட் ஆனார்கள் என்பது குறிப்பிடத்தக்கது.

தற்போது இங்கிலாந்து அணி 510 ரன்கள் பின்தங்கியுள்ள நிலையில், இந்தப் டெஸ்ட் போட்டியில் இந்தியா வெற்றிபெற அதிக வாய்ப்பு இருப்பதாக கூறப்படுகிறது. இந்திய பந்துவீச்சாளர்களின் அபாரமான செயல்பாட்டால், இங்கிலாந்து அணிக்கு நெருக்கடி அதிகரித்துள்ளது.

Edited by Siva