17 ஆவது சீசன் ஐபிஎல் தொடர் தொடங்கி விறுவிறுப்பாக நடந்து வருகிறது. இதுவரை ஒவ்வொரு அணியும் தலா 4 போட்டிகளை விளையாடியுள்ளன. ராஜஸ்தான், கொல்கத்தா, சென்னை, லக்னோ ஆகிய நான்கு அணிகள் முன்னணியில் உள்ளன.
இன்னும் நிறைய போட்டிகள் உள்ளதால் புள்ளி பட்டியலில் மாற்றம் இருக்கலாம். இந்நிலையில் இன்று சண்டிகாரில் நடக்க உள்ள போட்டியில் பஞ்சாப் மற்றும் சன் ரைசர்ஸ் ஐதராபாத் ஆகிய அணிகள் மோதுகின்றன. இரு அணிகளும் நான்கு போட்டிகளில் விளையாடி 2 போட்டிகளில் வென்றுள்ளன.
சன் ரைசர்ஸ் அணி இந்த சீசனில் பேட்டிங்கில் ஆதிக்கம் செலுத்தும் அணியாக உருவாகியுள்ளது. அந்த அணியின் அபிஷேக் சர்மா, டிராவிஸ் ஹெட் மற்றும் ஹெண்ட்ரிச் கிளாசன் ஆகியோர் அபார ஃபார்மில் உள்ளனர். அதுபோல பவுலிங்கில் பேட் கம்மின்ஸ், புவனேஷ்வர் குமார் என பலமிக்கதாக உள்ளது.
பஞ்சாப் அணியை எடுத்துக்கொண்டால் ஷிகார் தவான், லியாம் லிவிங்ஸ்டன் உள்ளிட்டோரை அந்த அணி சார்ந்துள்ளது. பவுலிங்கில் ஸ்டார் பவுலர்கள் இல்லை என்றாலும் இளம் பவுலர்கள் சிறப்பாக பந்துவீசி வருகின்றனர்.
