தமிழ் சினிமாவில் மிக இளம் வயதிலேயே இயக்குனராக தனக்கென ஒரு பாணியை உருவாக்கி வெற்றிகளைக் குவித்தவர் செல்வராகவன். அவர் இயக்கிய துள்ளுவதோ இளமை, காதல் கொண்டேன், 7 ஜி ரெயின்போ காலணி ஆகிய படங்கள் வணிக ரீதியாகவும் புதுப்பேட்டை மற்றும் ஆயிரத்தில் ஒருவன் ஆகிய திரைப்படங்கள் கமர்ஷியலாக வெற்றிப் பெறாவிட்டாலும் நல்ல விமர்சனங்களையும் குவித்தன.
ஆனால் சமீபகாலமாக அவரது படங்கள் வசூல் ரீதியாகவும், விமர்சன ரீதியாகவும் தோல்வியைக் கண்டு வருகின்றன. இடையில் அவர் சாணிக் காயிதம் திரைப்படம் மூலமாக நடிகராக அறிமுகமாகி கவனம் பெற்றார். இந்நிலையில் இப்போது 7ஜி ரெயின்போ காலணி 2 படத்தை இயக்கி வருகிறார்.
அந்த படம் பைனான்ஸ் பிரச்சனைகள் காரணமாக தடைபட்டு நிற்பதால் தற்போது ஜி வி பிரகாஷைக் கதாநாயகனாக்கி ‘மெண்டல் மனதில்’ என்ற படத்தை இயக்கவுள்ளார். சமீபத்தில் இந்த படத்தின் முதல் லுக் போஸ்டர் வெளியான நிலையில் இன்று பூஜையோடு படப்பிடிப்பு தொடங்கியுள்ளது.
