நடிகர் விஜய் நடிப்பில் வெளியான காதலுக்கு மரியாதை திரைப்படம் வெளியாகி 23 ஆண்டுகள் நிறைவடைந்துள்ளது.
நடிகர் விஜய் தனது தந்தையால் அறிமுகப்படுத்தப் பட்டு கிட்டத்தட்ட பி கிரேட் படங்களுக்கு நிகரான படங்களில் நடித்து வந்தார். அவருக்கு முதல் வெற்றியையும் நல்ல பெயரையும் வாங்கிக் கொடுத்த திரைப்படம் என்றால் அது விக்ரமனின் பூவே உனக்காக. அதன் பிறகு அவரின் இரண்டாவது ஹிட் படமாக அமைந்தது காதலுக்கு மரியாதை திரைப்படம். இந்த படத்தை மலையாள இயக்குனர் பாசில் இயக்கி இருந்தார். இந்த படத்தின் மூலம் தான் ஷாலினி தமிழ் சினிமாவுக்கு அறிமுகமானார்.
இந்த படம் வெளியாகி இப்போது 23 ஆண்டுகள் நிறைவடைந்துள்ளன. இதைக் கொண்டாடும் விதமாக விஜய் ரசிகர்கள் சமூகவலைதளங்களில் ஹேஷ்டேக்குகளை உருவாக்கி வந்தனர். இந்நிலையில் இந்த படத்தைப் பற்றிய சுவாரஸ்யமான தகவல் ஒன்று வெளியாகியுள்ளது. அது என்னவென்றால் முதலில் இந்த படத்தில் நடிக்க இருந்தது விஜய் இல்லையாம். அப்போது சாக்லேட் பாயாக வலம் வந்த அப்பாஸ்தானாம். ஆனால் அவர் கடைசி நிமிடத்தில் படத்தில் இருந்து விலகியதால் அவருக்கு பதில் விஜய் நடிக்க ஒப்பந்தம் ஆகியுள்ளார்.