தமிழக சட்டமன்றம் இன்று கூடிய நிலையில் அரசின் உரையை ஆளுநர் ஆர் என் ரவி வாசிப்பார் என்று எதிர்பார்க்கப்பட்ட நிலையில் மூன்றே நிமிடங்களில் அவர் சட்டமன்றத்தை விட்டு வெளியேறினார்.
இது பெரும் பரபரப்பை ஏற்படுத்திய நிலையில் ஆளுநர் மாளிகை இதுகுறித்து தனது சமூக வலைதள பக்கத்தில் விளக்கம் அளித்து அதன் பின் அந்த விளக்கத்தை ஒரு சில நிமிடங்களில் நீக்கியது. இதையடுத்து தற்போது மீண்டும் ஒரு விளக்கத்தை ஆளுநர் மாளிகை வெளியிட்டுள்ளது. அந்த விளக்கத்தில் கூறி இருப்பதாவது:
தமிழ்நாடு சட்டப்பேரவையில் இன்று மீண்டும் பாரதத்தின் அரசியலமைப்பு மற்றும் தேசிய கீதம் அவமதிக்கப்பட்டன. தேசிய கீதத்தை மதித்தல் என்பது நமது அரசியலமைப்பில் வகுக்கப்பட்டுள்ள முதலாவது அடிப்படை கடமையாகும். அது அனைத்து சட்டப்பேரவைகளிலும் ஆளுநர் உரையின் தொடக்கத்திலும் முடிவிலும் பாடப்படுகிறது.
இன்று ஆளுநர் அவர்கள் பேரவைக்கு வரும்போது தமிழ்த்தாய் வாழ்த்து மட்டும் பாடப்பட்டது. ஆளுநர் அவர்கள் பேரவையிடம் அதன் அரசியலமைப்பு கடமையை மரியாதையுடன் நினைவூட்டியதுடன், தேசிய கீதத்தைப் பாடுவதற்காக அவைத் தலைவரான மாண்புமிகு முதலமைச்சர் அவர்களிடமும் மாண்புமிகு சட்டப்பேரவை சபாநாயகர் அவர்களிடமும் உருக்கமாக வேண்டுகோள் விடுத்தார்.
ஆனால், அவர்கள் திட்டவட்டமாக மறுத்துவிட்டனர். இது மிகவும் கவலைக்குரிய விஷயமாகும். அரசியல் சாசனம் மற்றும் தேசிய கீதத்தை அப்பட்டமாக அவமதிக்கும் செயல்களுக்கு உடந்தையாக இருந்து விடக்கூடாது என்பதால் ஆளுநர் அவர்கள் கடும் வேதனையுடன் சட்டப்பேரவையை விட்டு வெளியேறினார்.
