ஆந்திரப் பிரதேச முதல்வர் சந்திரபாபு நாயுடு புட்டபர்த்தியில் உள்ள ஒரு அரசு பள்ளியில் இன்று 45 நிமிடங்கள் சமூக அறிவியல் பாடம் நடத்தி ஆசிரியராக மாறினார். மாநில அரசின் 'மெகா பெற்றோர்-ஆசிரியர் சந்திப்பு திட்டத்தின் ஒரு பகுதியாக இந்த நிகழ்வு நடைபெற்றது.
கோத்தச்செருவுவில் உள்ள மாவட்ட பரிஷத் உயர்நிலைப் பள்ளியில் பத்தாம் வகுப்பு மாணவர்களுக்கு சந்திரபாபு நாயுடு வழங்கிய இந்த விரிவுரையில் அவர் மாணவர்களுடன் கலந்துரையாடினார், அவர்களின் முன்னேற்ற அட்டைகளை ஆய்வு செய்தார், மேலும் கல்வியில் சிறந்து விளங்க அவர்களை ஊக்குவிக்கும் வகையில் வழிகாட்டுதலையும் வழங்கினார்.
மேலும் இதே அமர்வில் கல்வி மற்றும் தகவல் தொழில்நுட்பத் துறை அமைச்சர் நாரா லோகேஷ் ஒரு மாணவரை போல கலந்துகொண்டு உரையாற்றினார். ஆந்திரப் பிரதேசம் முழுவதும் 2.3 கோடிக்கும் அதிகமான மக்கள், அதாவது மாணவர்கள், பெற்றோர்கள், ஆசிரியர்கள், அதிகாரிகள், நன்கொடையாளர்கள் மற்றும் முன்னாள் மாணவர்கள் இந்த பெற்றோர்-ஆசிரியர் சந்திப்பில் பங்கேற்றதாகவும், இது ஒரே நாளில் நடைபெற்ற மிகப்பெரிய திட்டங்களில் ஒன்றாகும் என்றும் லோகேஷ் குறிப்பிட்டார்.
"நீங்கள் எவ்வளவு குழந்தைகளை பள்ளிக்கு அனுப்புகிறீர்களோ, அவ்வளவு அதிகமாக அவர்கள் எதிர்காலத்தில் பயனடைவார்கள். அரசின் முதன்மை திட்டமான தல்லிகி வந்தனம் திட்டத்தின் கீழ், தங்கள் குழந்தைகளை பள்ளிக்கு அனுப்பும் ஒவ்வொரு தாய்க்கும் ஒரு குழந்தைக்கு ஆண்டுக்கு ரூ.15,000 கிடைக்கும். உங்கள் குழந்தைகளை தினமும் பள்ளிக்கு அனுப்புங்கள், அவர்கள் பள்ளிக்கு வராமல் இருப்பதைத் தடுக்க உறுதிப்படுத்திக் கொள்ளுங்கள்," என்று பெற்றோர்களுக்கு சந்திரபாபு நாயுடு அறிவுறுத்தினார்.
