GOAT படத்துக்குப் பிறகு விஜய், ஹெச் வினோத் இயக்கும் ‘ஜனநாயகன்’ படத்தில் நடித்து வருகிறார். அந்த படம் முடிந்ததும் அவர் சினிமாவை விட்டு முழு நேர அரசியலுக்கு செல்லவுள்ளார். அதனால் படத்தின் மீது மிகப்பெரிய அளவில் எதிர்பார்ப்பு நிலவுகிறது. இந்த படத்துக்கு அனிருத் இசையமைக்க, சத்யன் சூர்யன் ஒளிப்பதிவு செய்கிறார். KVN புரொடக்ஷன்ஸ் என்ற நிறுவனம் தயாரிக்கிறது.
இந்த படத்தில் கதாநாயகியாக பூஜா ஹெக்டே, மமிதா பைஜு, பிரகாஷ் ராஜ், பாபி தியோல் உள்ளிட்ட பலர் நடிக்கின்றனர். கடந்த ஆண்டு இறுதியில் இந்த படத்தின் ஷூட்டிங் தொடங்கியது. முதலில் ஒரு பிரம்மாண்டமானப் பாடல் காட்சியை படமாக்கினார் இயக்குனர் வினோத். இப்போது சென்னையில் முக்கியமானக் காட்சிகள் படமாக்கப்பட்டு வருகின்றன.
முதலில் இந்த படம் அக்டோபர் மாதம் தீபாவளியை முன்னிட்டு ரிலீஸாகும் என அறிவிக்கப்பட்டது. ஆனால் இப்போது அடுத்த ஆண்டு பொங்கல் பண்டிகைக்குதான் ரிலீஸ் ஆகும் என சொல்லப்படுகிறது. இதற்குக் காரணம் இந்த படத்தின் ஓடிடி ரிலீஸ் வியாபாரம் இன்னும் முடியவில்லையாம். இந்த படத்தை நெட்பிளிக்ஸ் நிறுவனம்தான் வாங்கவுள்ளதாக சொல்லப்படுகிறது. ஆனால் நெட்பிளிக்ஸ் நிறுவனம் 2025 ஆம் ஆண்டுக்கான தங்கள் அட்டவணையை நிறைவு செய்துவிட்டதாக சொல்லப்படுகிறது. அதனால்தான் விஜய் படம் 2026 ஆம் ஆண்டுக்கு ஒத்திவைக்கப்படுவதாக சொல்லப்படுகிறது.
