Publish Date: Thu, 18 Oct 2007 (13:21 IST)
Updated Date: Sat, 22 Feb 2014 (19:21 IST)
முன்னாள் முதல்வர் ஜெயலலிதா மீது கொண்டுவந்த உரிமை மீறலை உரிமைக் குழுவிற்கு அனுப்ப அவைத் தலைவர் உத்தரவிட்டதை எதிர்த்து ரகளையில் ஈடுபட்ட அ.இ.அ.தி.மு.க உறுப்பினர்கள் அனைவரும் இத்தொடர் முடியும் வரை நீக்கம் செய்யப்பட்டனர்.
அவைத் தலைவரையும் தாக்க முயன்றதால் அ.இ.அ.தி.மு.க உறுப்பினர்கள் அனைவரும் கூண்டோடு வெளியேற்றப்பட்டனர். அவர்களைக் கூட்டத் தொடர் முழுவதும் நீக்கி அவைத் தலைவர் உத்தரவிட்டார்.
இரண்டாவது நாளாக இன்று காலை சட்டப் பேரவை கூடியது.
கேள்விநேரம் முடிந்ததும் எழுந்த அமைச்சர் மு.க.ஸ்டாலின், முன்னாள் முதல்வர் ஜெயலலிதா கூறியதாக பத்திரிக்கைகளில் வந்துள்ள செய்திகளைச் சுட்டிக் காட்டினார். இப்பிரச்சனையை உரிமைமீறல் குழுவிற்கு அனுப்பி விசாரணை நடத்த வேண்டும் என்றும் அவர் கோரிக்கை விடுத்தார். இப்பிரச்சனையை நீதிமன்றத்தில் சந்திக்கவும் தான் தயார் என்று மு.க.ஸ்டாலின் தெரிவித்தார்.
இதற்கு எதிர்ப்பு தெரிவித்து அ.இ.அ.தி.மு.க உறுப்பினர்கள் எழுந்து கூச்சலிட்டனர். அவையின் நடுப்பகுதிக்கு வந்து அவைத் தலைவரிடம் எதிர்ப்பு தெரிவித்து முழக்கமிட்டனர்.
அமைச்சர் ஸ்டாலின் எழுப்பிய பிரச்சனையை உரிமைக் குழுவிற்கு அனுப்பி விசாரிக்க அவைத் தலைவர் ஆவுடையப்பன் உத்தரவிட்டார்.
அவர் மேஜை முன்பு கூடியிருந்த அ.இ.அ.தி.மு.க உறுப்பினர்கள் அவைத் தலைவரின் அருகில் இருந்த காவலரின் தொப்பியைப் பிடுங்கி அவர் மீது எறிந்தனர்.
பின்னர் இந்நிகழ்வு குறித்துக் கருத்துத் தெரிவித்த முதலமைச்சர் கருணாநிதி, ' இது ஒரு வெறுக்கத்தக்க நிகழ்வு' என்றார்.
