கடத்தல்காரர்களுக்கும் பயங்கரவாதிகளுக்கும் உள்ள தொடர்பு அதிகரித்து வருவதைத்தான் மும்பை பயங்கரவாதத் தாக்குதல் காட்டுகிறது என்று கூறிய மாலத்தீவு அதிபர் மொஹம்மது நஷீத், இந்தியப் பெருங்கடல் பகுதியில் கண்காணிப்பை அதிகரிக்க வேண்டும் என்று வலியுறுத்தினார்.
தனது மூன்று நாள் இந்தியச் சுற்றுப் பயணத்தை முடித்துக்கொள்ளும் வகையில் மாலத்தீவு அதிபர் மொஹம்மது நஷீத் டெல்லியில் இன்று செய்தியாளர்களிடம் கூறியதாவது:
கடத்தல்காரர்களுக்கும் பயங்கரவாதிகளுக்கும் இடையிலான தொடர்புகள் அதிகரித்து வருகிறது. இதைத்தான் மும்பையில் கடந்த நவம்பர் 26 அன்று நடந்துள்ள தாக்குதல்கள் காட்டுகின்றன.
இந்தத் தாக்குதலானது 16 ஆம் நூற்றாண்டில் கடல் கொள்ளையர் நடத்திய தாக்குதல்களை நினைவூட்டுகிறது. கடற்கொள்ளையர்களைப் போலவே பயங்கரவாதிகளும் எல்லாக் கடல் வழிகளையும் கடத்தல்காரர்களின் உதவியுடன் தெரிந்து வைத்துள்ளனர்.
இதைத் தடுக்கக் கண்காணிப்பு அதிகரிக்கப்பட வேண்டும். இந்தியப் பெருங்கடல் பகுதிகளில் கூட்டுக் கண்காணிப்பு மேற்கொள்ள மாலத்தீவு ஒத்துழைக்கும்.
மாலத்தீவில் கல்வி நிறுவனங்கள் குறைவாக உள்ளன. எனவே இளைஞர்கள் கல்வி கற்க அயல்நாடுகளுக்குச் செல்கின்றனர். அண்மையில் 150 இளைஞர்கள் மதரசாக்களில் கல்வி கற்பதற்காக பாகிஸ்தான் சென்றுள்ளனர். இதில் 40 பேர் மதக்கல்வி கற்கச் சென்றுள்ளனர்.
இந்திய அரசு தனது கல்வி நிறுவனங்களையும், பல்கலைக்கழகங்களையும் மாலத்தீவில் துவங்குவதற்கு முன்வர வேண்டும். இதனால் மாலத்தீவு இளைஞர்கள் பாகிஸ்தான் மதரசாக்களுக்கு செல்வது தடுக்கப்படும்.
இவ்வாறு மொஹம்மது நஷீத் தெரிவித்தார்.
