இந்தியக் கடல் எல்லைக்குள் அத்துமீறி நுழைந்து மீன் பிடித்த 56 பாகிஸ்தான் மீனவர்களை இந்தியக் கடற்படையினர் கைது செய்துள்ளதாக பாகிஸ்தான் கடலோரக் காவற்படை அதிகாரிகள் தெரிவித்துள்ளனர்.
தட்டா துறைமுகம் உள்ளிட்ட குறிப்பிட்ட சில பகுதிகளில் தொடர்ந்து பாகிஸ்தான் மீனவர்களை இந்தியக் கடற்படையினர் அத்துமீறிக் கைது செய்வது தொடர்ந்து நடந்து வருகிறது என்றும் பாகிஸ்தான் அதிகாரிகள் குற்றம்சாற்றியுள்ளனர்.
இந்தியக் கடற்படையினர் சுற்றிவளைத்தபோது கடலில் குதித்து அதிர்ஷ்டவசமாக தப்பிய மீனவர்கள் தெரிவித்த தகவலின் பேரில்தான் பாகிஸ்தான் மீனவர்கள் கைது செய்யப்பட்டுள்ள விவரம் தெரியவந்துள்ளது என்று தட்டா பகுதி மீனவர் சங்கச் செயலர் சையது குலாப் ஷா கூறியுள்ளார்.
பாகிஸ்தான் மீனவர்களை இந்தியக் கடற்படையினர் கைது செய்த நேரம் பற்றிய விவரங்களைத் தெரிவிக்க பாகிஸ்தான் அதிகாரிகள் மறுத்துவிட்டனர்.
