சட்டீஸ்கர் மாநிலத்தில் மாவோயிஸ்ட் தீவிரவாதிகள் வைத்த சக்தி வாய்ந்த கண்ணி வெடியில் சிக்கி 3 மத்திய ரிசர்வ் காவல் படையினர் உள்பட 4 காவல் துறையினர் உடல் சிதறி பலியானார்கள். மேலும் 6 பேர் படுகாயமடைந்தனர்.
பல்ராம்பூர் மாவட்டம் சம்ரி காவல் நிலைய பகுதிக்கு உட்பட்ட ஜார்க்கண்ட் மாநில எல்லையில் உள்ள சுன்சுனா கிராமத்தில் இந்த சக்தி வாய்ந்த கண்ணி வெடியை மாவோயிஸ்ட் தீவிரவாதிகள் வெடிக்கச் செய்தனர்.
வனப்பகுதியில் தேடுதல் வேட்டையில் ஈடுபட்டிருந்த காவல் துறையினர் சம்ரி என்னுமிடத்தில் இருந்து குஸ்மி என்ற இடத்துக்கு வாகனத்தில் சென்று கொண்டிருந்த போது இன்று மதியம் 2 மணியளவில் குண்டு வெடித்தது.
இந்த கண்ணி வெடியில் சிக்கி 3 மத்திய ரிசர்வ் காவல் படையினர் உள்பட 4 காவல் துறையினர் உடல் சிதறி பலியானார்கள். மேலும் 6 பேர் படுகாயமடைந்தனர். இதையடுத்து சம்பவ இடத்துக்கு கூடுதல் படையினர் விரைந்துள்ளனர்.
