Publish Date: Sat, 07 Feb 2009 (10:53 IST)
Updated Date: Sat, 07 Feb 2009 (10:53 IST)
இலங்கையின் வன்னி பகுதியில் சிறிலங்கா படையினர் நேற்று பரவலாக நடத்திய பீரங்கித் தாக்குதல்களில் 48 தமிழர்கள் உயிரிழந்துள்ளனர். 174 பேர் காயமடைந்துள்ளனர்.
முல்லைத்தீவின் மாத்தளான் பகுதியில் நேற்று காலை 8 மணியளவில் சிறிலங்கா படையினர் நடத்திய பீரங்கித் தாக்குதலில் 5 தமிழர்கள் படுகொலை செய்யப்பட்டனர். 13 பேர் காயமடைந்தனர்.
இதேபோல் தேவிபுரம் பகுதியில் நேற்று பிற்பகல் 12 மணியளவில் நடத்தப்பட்ட எறிகணைத் தாக்குதலில் 2 சிறுவர்கள் உயிரிழந்தனர். இவர்கள் இருவரும் சகோதரர்கள் என புதினம் செய்தி தெரிவிக்கிறது.
தேவிபுரம் ஆற்றங்கரைப் பகுதியில் இடம்பெயர்ந்து தங்கியிருந்த மக்களின் குடிசைகள் மீது நேற்று முழுவதும் எறிகணை மற்றும் பல்குழல் வெடிகணைத் தாக்குதல்களை படையினர் நடத்தியதில் 2 தமிழர்கள் படுகொலை செய்யப்பட்டதுடன் 22 பேர் காயமடைந்துள்ளனர்.
சுதந்திரபுரம் வீட்டுத்திட்டம் மீது நேற்று பிற்பகல் 4.35 மணியளவில் சிறிலங்கா படையினர் நடத்திய எறிகணை, பல்குழல் வெடிகணை மற்றும் பீரங்கித் தாக்குதலில் 6 தமிழர்களை படுகொலை செய்யப்பட்டுள்ளனர்.
மூங்கிலாறு பகுதி மீது நேற்று முழுவதும் சிறிலங்கப் படையினர் நடத்திய தாக்குதலில் 11 தமிழர்கள் படுகொலை செய்யப்பட்டுள்ளனர்.
இதேபோல் முல்லைத்தீவின் உடையார்கட்டு பகுதியில் 8 தமிழர்களும், வள்ளிபுனம் பகுதியில் 14 தமிழர்களும் படுகொலை செய்யப்பட்டுள்ளனர்.
