அமெரிக்காவில் மருத்துவப் பட்ட மேற்படிப்பு படித்து வந்த ஆந்திரப் பிரதேசம் மாநிலத்தைச் சேர்ந்த மாணவி சிகாகோ நகரில் மர்ம மனிதரால் சுட்டுக்கொல்லப்பட்டார்.
ஆந்திரப் பிரதேச மாநிலம் அடிலாபாத் மாவட்டத்தில் உள்ள முனியல் கிராமத்தைச் சேர்ந்தவர் சவும்யா ரெட்டி. இவர் ஆந்திராவில் எம்.பி.பி.பிஸ்., படித்துவிட்டு எம்.எஸ். மேற்படிப்பிற்காக அமெரிக்கா சென்றார்.
இந்நிலையில், சிகாகோவில் அடையாளம் தெரியாத மர்மமனிதர் ஒருவரால் நேற்றிரவு அவர் சுட்டுக்கொல்லப்பட்டார்.
கடந்த ஆண்டு டிசம்பர் முதல், ஆந்திராவில் இருந்து அமெரிக்கா சென்று பலியானவர்களில் சவும்யா ரெட்டி 4-வது மாணவி என்பது குறிப்பிடத்தக்கது.
முன்னதாக கடந்த மார்ச் மாதம் கரீம் நகரைச் சேர்ந்த ஸ்ரீனிவாஸ் என்ற முதுகலை மருத்துவ மாணவரும், 2007ஆம் ஆண்டு டிசம்பர் மாதம் லூசியானா பல்கலைக் கழகத்தில், கிரண்குமார் மற்றும் சந்திரசேகர் ரெட்டி என்ற 2 ஆராய்ச்சி மாணவர்களும் சுட்டுக் கொல்லப்பட்டனர் என்பது குறிப்பிடத்தக்கது.
