பாகிஸ்தானில் கடந்த ஆண்டில் நடந்த 1,503 தாக்குதல்கள் மற்றும் மோதல்களில் 3,448 பேர் கொல்லப்பட்டுள்ளனர் என்றும், இது அந்நாட்டு பாதுகாப்பில் அதிருப்தியை உருவாக்கி உள்ளதாகவும் ஆய்வறிக்கை ஒன்று தெரிவிக்கிறது.
பாகிஸ்தானில் ராணுவத்தின் மீது நடத்தப்பட்டு வரும் தொடர்ச்சியான தாக்குதல்கள் அந்நாட்டு ராணுவத்தின் உறுதி பற்றி கேள்வி எழுப்பியுள்ள நிலையில் நடந்துள்ள பெனாசிர் புட்டோ படுகொலை, பாகிஸ்தானின் ஒட்டு மொத்த பாதுகாப்பையும் அதிருப்திக்கு உள்ளாக்கியுள்ளது.
இந்நிலையில், பாகிஸ்தான் அமைதி கல்வி நிறுவனம் சார்பில் 2007 இல் பாகிஸ்தானின் பாதுகாப்பு பற்றிய ஆய்வறிக்கை வெளியிடப்பட்டுள்ளது. அதில் தெரிவிக்கப்பட்டுள்ள விவரங்கள் வருமாறு:
கடந்த 2007 ஆம் ஆண்டில் மொத்தம் 1,503 தாக்குதல்களும் மோதல்களும் நடந்துள்ளன. இதில் 3,448 பேர் கொல்லப்பட்டுள்ளதுடன் 5,353 பேர் படுகாயமடைந்துள்ளனர்.
இது கடந்த 2005, 2006 ஆம் ஆண்டுகளுடன் ஒப்பிடுகையில் முறையே 128 விழுக்காடு மற்றும் 491.7 விழுக்காடு அதிகமாகும்.
கடந்த ஆண்டு மாகாணங்கள் வாரியாக அதிகரித்துள்ள தாக்குதல்களைப் பார்க்கையில், பாகிஸ்தானின் ஒட்டுமொத்த பாதுகாப்பு அமைப்பிலும் மிகப் பெரிய குறைபாடு உள்ளது தெரிகிறது.
குறிப்பாக, பாதுகாப்புப் படையினர் நேரடியான மிரட்டல்களைச் சந்தித்ததுடன், தங்களையே காப்பாற்றிக் கொள்ளக் இயலாதவர்கள் போலத் தோன்றினர்.
இதற்கு ஆதாரமாக, 2007 இல் மட்டும் பயங்கரவாதிகளின் தற்கொலைத் தாக்குதல்களில் 232 படையினர், 163 துணை ராணுவப் படையினர், 71 காவலர்கள் கொல்லப்பட்டுள்ளனர்.
மொத்தம் நடந்துள்ள 60 தற்கொலைத் தாக்குதல்களில் பெரும்பாலானவை பாதுகாப்புப் படையினரைக் குறிவைத்து நடத்தப்பட்டுள்ளன. இவற்றில் மொத்தம் 770 பேர் கொல்லப்பட்டதுடன் 1,574 பேர் படுகாயமடைந்தனர்.
லால் மசூதிக்குள் ராணுவம் நுழைந்த தாக்கிய பிறகு தற்கொலைத் தாக்குதல்கள் அதிகரித்துள்ளன.
ஜூலை மாதத்தில் மட்டும் வடமேற்கு மாகாணம், பஞ்சாப், இஸ்லாமாபாத் பகுதிகளில் 15 தற்கொலைத் தாக்குதல்கள் நடந்துள்ளன. இவற்றில் 191 பேர் கொல்லப்பட்டதுடன் 366 பேர் படுகாயமடைந்தனர்.
இவை தவிர 2007 இல் 12 அரசியல் வன்முறைகள் நடந்துள்ளன. இவற்றில் 64 பேர் கொல்லப்பட்டதுடன் 64 பேர் படுகாயமடைந்தனர்.
ஆஃப்கானிஸ்தானில் இருந்து பாகிஸ்தானிற்குள் மலைப்பகுதிகள் வழியாக பயங்கரவாதிகள் அதிக அளவில் ஊடுருவியதும் கடந்த ஆண்டுதான்.
குறிப்பாக ஸ்வாட் பள்ளத்தாக்கு போன்ற பழங்குடியினர் பகுதிகளில் பாதுகாப்புப் படையினருக்கும் பயங்கரவாதிகளுக்கும் இடையே மோதல் அதிகரித்தது.
இவ்வாறு அந்த அறிக்கையில் கூறப்பட்டுள்ளது.
