சத்தீஸ்கர் மாநிலத்தில் பழங்குடியினர் வாழ்ந்துவரும் பஸ்தார் பகுதிகளில் உள்ள கனிம வளங்களைக் கைப்பற்றி அதனை தனியாருக்கு தாரை வார்க்கவே அரசு மிகப் பெரிய காவல் நடவடிக்கையை முடிக்கிவிட்டுள்ளது என்று அப்பகுதியில் சேவையாற்றிவரும் காந்தியவாதி ஹிமான்சு குமார் கூறினார்.‘சத்திஸ்கரில் நிலம், வன்முறை, மேம்பாடு’ என்றத் தலைப்பில் சென்னை லயோலா கல்லூரியில் புதன்கிழமை மாலை நடந்த கருத்தரங்கில், சத்தீஸ்கர் மாநிலத்தின் பஸ்தார் என்றழைக்கப்படும் பகுதியிலுள்ள தாண்டிவாடா மாவட்டத்தில் ஆசிரமம் அமைத்து கடந்த 17 ஆண்டுகளாக சேவையாற்றிவரும் காந்தியவாதி ஹிமான்சு குமார் பேசினார்.பஸ்தார் பகுதியில் உள்ள கனிம வளங்களால் ஈர்க்கப்படும் தொழில் நிறுவனங்கள், அந்தக் கனிம வளங்களைப் பயன்படுத்தி வணிகம் செய்வதற்குத் தடையாகவுள்ள பழங்குடியின மக்களை வெளியேற்ற கடந்த பல ஆண்டுகளாகவே முயற்சித்து வருகின்றனர் என்றும், அதனை எதிர்த்து அந்த மக்களும் தொடர்ந்து போராடி வருகின்றனர் என்றும் கூறிய ஹிமான்சு, தொழில் நிறுவனங்களுக்குச் சாதகமாக பழங்குடியினரை வெளியேற்றுவதில் அங்குள்ள மாநில அரசு, காவல் துறையினரைப் பயன்படுத்தி நடத்திவரும் வன்முறையால் 700க்கும் அதிகமான கிராமங்களில் வசித்துவந்த பழங்குடியின மக்கள் அடர்ந்த காடுகளுக்குள் துரத்தப்பட்டுள்ளனர் என்றும், அவர்களை ஒழித்துக்கட்டவே மாவோயிஸ்ட்டுகளுக்கு எதிரானப் போர் என்று இப்போது அறிவித்து நடவடிக்கை எடுக்கப்படுகிறது என்றும் கூறினார்.2005
ஆம் ஆண்டிலிருந்துதான் பழங்குடியினரை துரத்தியடிக்க திட்டமிடப்பட்ட தீவிர முயற்சி துவக்கப்பட்டது என்றும், அப்போதுதான் சல்வா ஜூடும் என்றழைக்கப்படும் ‘அமைதி இயக்கம்’ தொடங்கப்பட்டதெனக் கூறிய ஹிமான்சு குமார், 2005ஆம் ஆண்டு ஜூலை மாதம் தாண்டிவாடாவில் சுரங்கம் தோண்டுவதற்கு சத்தீஸ்கர் அரசுடன் டாடா நிறுவனம் புரிந்துணர்வு ஒப்பந்தம் போடப்பட்டதாகவும், அடுத்த ஒரு மாத காலத்தில் சல்வா ஜூடும் தொடங்கப்பட்டது என்பதைச் சுட்டிக்காட்டி, பழங்குடியினரை துரத்தியடிக்க திட்டமிட்டு உருவாக்கப்பட்டதே சல்வா ஜூடும் என்பதை புரிந்துகொள்ள வேண்டும் என்றார்.பழங்குடியினரை அவர்களின் பாரம்பரிய வாழ்விடங்களில் இருந்து துரத்திவிட்டு, அப்பகுதியில் உள்ள கனிம வளங்களைக் கைப்பற்ற அரசும், தனியார் தொழில் நிறுவனங்களும் இணைந்து திட்டமிட்டதும், அதற்குத் தடையாக உள்ள பழங்குடியினரை அங்கிருந்து துரத்தியடிக்கவே மாவோயிஸ்ட்டுகளின் பெயரைப் பயன்படுத்துகின்றன என்று கூறிய ஹிமான்சு குமார், தங்கள் வாழ்விடங்களில் இருந்து துரத்தியடிக்கப்பட்ட 4 இலட்சம் பழங்குடியின மக்களுடன் மாவோயிஸ்ட்டுகளும் இருப்பது உண்மைதான் என்றாலும், அவர்களின் எண்ணிக்கை மிக மிகக் குறைவே என்று கூறினார்.700
க்கும் அதிகமான கிராமங்களில் இருந்து துரத்தப்பட்ட அடந்த வனப்பகுதிகளுக்குச் சென்றுள்ள மக்களை, சாலையோரங்களில் தாங்கள் அமைத்துள்ள முகாம்களுக்கு வருமாறு சல்வா ஜூடும் அமைப்பும், அரசும் அழைக்கின்றன என்றும், அந்த முகாம்களில் தஞ்சமடைந்த 50 ஆயிரத்திற்கும் அதிகமான மக்களுக்கு போதுமான உணவு, இருப்பிடம், குடிநீர் வசதிகளின்றி வைக்கப்பட்டுள்ளனர் என்று கூறிய ஹிமான்சு குமார், அடர்ந்த காடுகளுக்குச் சென்றுவிட்ட 3 இலட்சத்திற்கும் அதிகமான மக்களைத் தான் மாவோயிஸ்ட்டுகள் என்று கூறி, அவர்களுக்கு எதிராக போரைத் துவக்கியுள்ளது சத்தீஸ்கார் அரசு என்று கூறினார்.தங்கள் வாழ்விடங்களில் இருந்து வெளியேற்றப்படுவதை எதிர்க்கும் பழங்குடியினரை எவ்வாறு மாவோயிஸ்ட்டுகள் என்று கூற முடியும் என்று கேள்வி எழுப்பிய ஹிமான்சு குமார், அவர்களை அழிக்க நடவடிக்கை மேற்கொள்ளும் காவல் துறையினரும், சல்வா ஜூடும் அமைப்பினரும் பழங்குடியினப் பெண்களை பாலியல் வன்முறை உள்ளிட்ட பல்வேறு அத்துமீறல்களைச் செய்கின்றனர் என்றும் கூறினார்.தங்களுக்கு எதிராக இழைக்கப்படும் வன்முறைகள் தொடர்பாக பழங்குடியினர் புகார் கொடுத்தாலும் அவற்றின் மீது காவல் துறையினர் முதல் தகவல் அறிக்கை தாக்கல் செய்வதில்லை. நாங்கள் புலனாய்வு செய்த பின்னரே புகாரை ஏற்க முடியும் என்று கூறுகின்றனர். காவல் துறை சொல்வதை நீதிமன்றமும் ஏற்கிறது. இது தொடர்பாக உச்ச நீதிமன்றம் ஒரு உத்தரவைப் பிறப்பித்தும் அதனை சத்தீஸ்கர் அரசு கடைபிடிக்கவில்லை. நீதித்துறை, காவல்துறை, அரசு என்று எதுவும் பழங்குடியினருக்காக இல்லை” என்று ஹிமான்சு குமார் கூறினார்.இந்த நிலையில்தான் கடந்த ஜனவரி மாதம் சல்வா ஜூடும் அமைப்பால் நக்ஸலைட்டுகள் என்று கூறப்பட்டு 19 பேர் கொல்லப்பட்டனர் என்றும், கொல்லப்பட்ட பெண்களில் பலர் பாலியல் வன்முறைக்கு ஆளாக்கப்பட்ட பின்னரே குத்திக் கொல்லப்பட்டதாகவும், குத்திக் கொல்லப்பட்டவர்களின் உடல்களில் இருந்து குடல் முழுமையாக வெளியே வரும் வகையில் குத்திக் கொல்லப்பட்டனர் என்றும் கூறினார்.
அடர்ந்த காடுகளுக்குள் அடைக்கலமாகிவிட்ட பழங்குடியினர், தங்களுக்கு தேவையான சில உணவுப் பொருட்களை வாங்குவதற்கு காவல் துறையினர் கண்களில் படாமல் 85 கி.மீ. தூரம் நடந்துச் சென்று பொருட்களைப் பெற்றுக்கொண்டு மீண்டும் திரும்பும் நிலை உள்ளது என்றும், அவர்கள் எந்த வழியிலும் வெளியே வராமல் தடுத்து, பட்டினிப் போட்டு கொல்லும் திட்டத்துடன் அவர்களுக்கு எதிராக நடவடிக்கை எடுக்கப்பட்டு வருகிறது என்றும் கூறிய ஹிமான்சு குமார், அரசுகள் அமைதியைப் பற்றிப் பேசுகின்றன, பழங்குடியின மக்கள் நியாயத்தைப் பற்றிப் பேசுகின்றனர் என்றும், பழங்குடியினருக்கு எதிரான அரசின் நடவடிக்கைகள் ஆளுவோரின் அமைப்பு ரீதியிலான வன்முறையே என்று கூறினார்.
“ஆதிவாசிகளை சாதாரணமானவர்களாக அரசு நினைக்கிறது. அவர்கள் வெள்ளையர்களையே எதிர்த்துப் போராடியவர்கள். தங்கள் வாழ்நிலத்தை அவர்கள் விட்டுத் தரப்போவதில்லை” என்று கூறினார்.
வளர்ச்சிக்காகவே கனிம வளங்களை எடுக்க அரசும் தனியார் நிறுவனங்களும் திட்டமிடுகின்றன என்று கூறப்படுவதைப் பற்றி கேட்டதற்கு, “தவறான வளர்ச்சியை விட வளர்ச்சியின்மையே மேலானது” என்று வினோபா பாவே கூறியதை பதிலாகக் கூறினார்.
தவறான வளர்ச்சியை மத்திய தர மக்கள் ஆதரிக்கின்றனர், இதுவே வன்முறைக்கு வித்திடுகிறது. 700 கிராமங்களில் வாழ்ந்த மக்களை அழித்துவிட்டு எங்கே போய் சமாதானத்தைத் தேடுவீர்கள் என்று கேள்வி எழுப்பிய ஹிமான்சு குமார், “செகுசாக வாழ்ந்துகொண்டு அவர்களுக்கு எதிரானப் போரில் ஜெயிக்க முடியாது. நாம் அவர்களோடுச் சென்று அவர்களின் பிரச்சனைக்குத் தீர்வு காண முற்பட வேண்டும். இல்லையென்றால் இந்தப் போரில் நாம் தோற்றுவிடுவோம்” என்று கூறி முடித்தார்.
தனது மனைவியுடன் தான் 17 ஆண்டுகளுக்கு முன்னர் தாண்டிவாடாவிற்கு சென்றது, பழங்குடியினர் மத்தியில் சேவை செய்ய மட்டுமல்ல, அவர்களிடையே ஜனநாயகத்தை வலுப்படுத்தவும்தான் என்று கூறிய ஹிமான்சு குமார், “அதனை நாம் செய்யவில்லையென்றால், நமது நாட்டின் ஜனநாயகம் பெரும் நிறுவனங்களும், குண்டர்களும் ஆள வழிவகுக்கும் ஜனநாயகமாகிவிடும்” என்று மகாத்மா காந்தி கூறியதை சுட்டிக் காட்டினார்.
பழங்குடியினப் படுகொலை நடக்கப் போகிறது!
இலங்கையில் தமிழினப் படுகொலை நடத்தப்பட்டது போன்று, சத்தீஸ்கார், ஜார்க்கண்ட், ஒரிசா மாநிலங்களில் பழங்குடியின மக்கட் படுகொலை நடக்கப் போகிறது என்று தொழிற்சங்கவாதியான சுதா பரத்வாஜ் எச்சரித்தார்.
ஹிமான்சு குமார் பேசியதைத் தொடர்ந்து உரையாற்றிய சுதா பரத்வாஜ், பஸ்தார், ஜார்க்கண்ட் மாநிலங்களில் பழங்குடியினர் வாழும் பகுதிகளில் உள்ள பாக்சைட், யுரேனியம், வைரம் போன்ற கனிம வளங்களைக் கைப்பற்றவே 644 கிராமங்களில் இருந்து பழங்குடியின மக்கள் துரத்தியடிக்கப்பட்டுள்ளனர் என்றார்.
நமது நாட்டின் ஜனநாயக அமைப்புக்களை பெரும் தொழில் நிறுவனங்களின் கட்டுப்பாட்டில்தான் செயல்படுகின்றன என்று குற்றம் சாற்றிய சுதா, அதனால்தான் அவர்கள் கனிம வளங்களைக் கைப்பற்ற அரசுகள் தங்கள் ஆளுமையைப் பயன்படுத்தி பழங்குடியினரை விரட்டியடிக்கின்றன என்றார்.
சத்தீஸ்கார், ரைகார், ஜார்க்கண்ட், ஒரிசா மாநிலங்களில் மிகப் பெரிய அளவிற்கு பழங்குடியினர் வெளியேற்றப்படுகின்றனர் என்றும், அவர்கள் பகுதிகளில் உள்ள கனிம வளங்களை சுரங்கம் தோண்டி எடுக்க தொழில் நிறுவனங்களுடன் 96 புரிந்துணர்வு ஒப்பந்தங்கள் போடப்பட்டுள்ளன என்றும், இந்தப் பழங்குடியினர் வாழும் இடங்களில் இருந்து எடுக்கப்படும் இரும்புத் தாது ஒரு டன் ரூ.400க்கு தனியார்களுக்கு அரசு விற்கிறது என்றும், அவர்கள் அதனை தொழிற்சாலைகளுக்கு டன் ரூ.4,000க்கு விற்கின்றனர் என்றும் கூறிய சுதா, இதில் பழங்குடியின மக்களுக்கு உரியமாக டன்னிற்கு ரூ.27 மட்டுமே அளிக்கப்படுகிறது என்று கூறினார்.
மாவோயிஸ்ட்டுகளுக்கு எதிரானது என்று மத்திய, மாநில அரசுகள் அறிவித்துள்ள இந்தப் போர், உண்மையில் பழங்குடியினரின் விடுதலைப் போரை ஒடுக்க மேற்கொள்ளப்படும் இனப் படுகொலைப் போரே என்று கூறினார்.
அங்கே நக்ஸலைட்டுகள் உள்ளனர் என்று அரசு கூறுகிறது, நாம் தோற்றுவிட்டதால்தான் அங்கு நக்ஸலைட்டுகள் வந்தனர் என்று விநோபா பாவே கூறியதையே அரசுக்கு பதிலாகக் கூறினார் சுதா,
பழங்குடியினர் வாழ் பகுதிகளில் உள்ள கனிம வளங்களை எடுப்பதற்கு தனியார்களிடம் பெற்ற இலஞ்சப் பணமே மதுகோடாவிடமிருந்து கைப்ப்பற்றப்பட்ட ரூ. 4,000 கோடியென்றும், சத்தீஸ்கார் முதல்வர் இராமன் சிங்கும், ஒரிசா முதல்வர் நவீன் பட்நாயக்கும் எத்தனை ஆயிரம் கோடி பெற்றிருப்பார்கள் என்பதை சிந்தித்துப் பாருங்கள் என்று கூறினார்.
