என்ன இது? சிறப்பு பொருளாதார மண்டலங்கள் (Special Economic Zone) என்று கேள்விப்பட்டுள்ளோம், சிறப்பு தூக்கு மண்டலங்கள் என்று எதையும் கேள்விப்பட்டதில்லையே என்று கேட்கத் தோன்றுகிறதா?இப்படி அர்த்தம் அளிக்கும் வகையில்தான் நமது நாட்டில் விவசாயிகள் அதிகமாக தற்கொலை செய்து கொண்டு சாகும் மாநிலங்களைக் குறிப்பிட்டுள்ளது மத்திய அரசின் தேச குற்றப் பதிப்பு வாரியம் (National Crime Records Bureau - NCRB).
தொழில் வளர்ச்சியில் முன்னனியில் உள்ள மாநிலமான மராட்டியம், மத்தியப் பிரதேசம், ஆந்திரா, கர்நாடகா, சட்டீஸ்கர், கேரளா ஆகிய மாநிலங்களில்தான் விவசாயிகள் மிக அதிக அளவிற்கு தற்கொலை செய்து கொண்டு உயிரிழப்பது தொடர்ந்து - இன்று நேற்றல்ல, 1997 முதல் 2006 ஆம் ஆண்டுவரை - நடந்து வருவதால் இம்மாநிலங்களை சிறப்பு தூக்கு மண்டலங்கள் (Special Elimination Zone) என்று தேச குற்றப் பதிப்பு வாரியம் தனது அறிக்கையில் கூறியுள்ளது.
நாட்டின் ஒட்டுமொத்தப் பொருளாதார வளர்ச்சி விகிதம் 9 விழுக்காட்டைத் தாண்டும் என்றும், நாட்டின் தொழில் வளர்ச்சி முன்னெப்போதும் இல்லாத அளவிற்கு உயர்ந்து வருகிறது என்றும், தகவல் தொழில் நுட்பத்தில் ஒரு வல்லரசாக உருவாகி வருகிறது என்றும், உலகின் மூளைப் பலமாக உருவெடுத்து வருகிறது என்றும் அரசாலும், பெருவாரியான ஊடகங்களாலும் நாளும் சித்தரிக்கப்படும் நம் நாட்டின் கிராமப் புற அவல நிலையைத்தான் இப்படிப்பட்ட வார்த்தைகளால் சித்தரித்துள்ளது தேச குற்றப் பதிப்பு வாரியம்.
2006 ஆன் ஆண்டில் மட்டும் 17,060 விவசாயிகள் தற்கொலை!
பொருளாதார சீர்திருத்தம், தாராளமயமாக்கல் ஆகியவற்றால் நமது நாடு முன்னேற்றப் பாதையில் பீடு நடை போட்டுக் கொண்டிருக்கிறது என்று நாம் கூறிக்கொண்டிருந்த நேரத்தில்தான் நமது நாட்டின் கிராம்ப் புறங்களில் கடன் தொல்லைக் காரணமாக விவசாயிகள் தற்கொலை செய்து கொள்கின்றனர் என்ற அதிர்ச்சி செய்தி நம்மை உலுக்கியது.
அதுவரை தற்கொலை உள்ளிட்ட செயற்கை மரணங்களை பொதுவாக பட்டியலிட்ட தேச குற்றப் பதிப்பு வாரியம், 1997 ஆம் ஆண்டிலிருந்து விவசாயிகள் தற்கொலையை தனியாக பட்டியலிட தொடங்கிய போதுதான், நமது நாட்டின் புராதனத் தொழில் எப்படிப்பட்ட சிக்கலை சந்தித்து வருகிறது என்ற விவரம் தெரியவந்தது.
1997 ஆம் ஆண்டு முதல் 2005 ஆம் ஆண்டு வரையில் ஒன்றரை லட்சம் விவசாயிகள் தற்கொலை செய்து கொண்டு செத்த கணக்கை தேச குற்றப் பதிப்பு வாரியம் வெளியிட்டது. இப்படிப்பட்ட தற்கொலைகள் அதிகம் நிகழ்ந்த பகுதிகளில் பெருவாரியாக பருத்தி சாகுபடி நடந்து வந்ததும், அங்கெல்லாம் மான்சாட்டோ போன்ற பன்னாட்டு வேளாண் நிறுவனங்கள் விற்ற வீரிய விதைகள் பயன்படுத்தப்பட்டதும் தெரியவந்தது. இதெல்லாம் பழங்கதைகள்தான் என்றாலும், இன்றைக்கு இதனைக் குறிப்பிடக் காரணம், இந்த நிலை இன்றும் தொடர்கிறது என்று வந்த செய்தியே.
2006 ஆம் ஆண்டில் மேலும் 17,060 விவசாயிகள் தற்கொலை செயது கொண்டு மாண்டுள்ளனர் என்று தேச குற்றப் பதிப்பு வாரியம் கூறியுள்ளது. இவர்களையும் சேர்த்து கடந்த 10 ஆண்டுகளில் தற்கொலை செய்து கொண்டு மாண்ட விவசாயிகளின் எண்ணிக்கை 1,66,304 ஆக உயர்ந்துள்ளது.
கடன் தொல்லை, பருவ மழை பொய்த்தது, விளைச்சலுக்கு உரிய விலை கிடைக்காதது, விளைச்சலை அதிகப்படுத்தும் என்று உறுதியளிக்கப்பட்டு விற்கப்பட்டு - முதல் விளைச்சல் நன்றாக இருந்தும் - அடுத்தடுத்த சாகுபடிகள் தொடர்ந்து பொய்த்ததாலும், பூச்சி மருந்து அடித்து வளர்ந்த தழைகளைத் தின்ற கால்நடைகள் இறந்ததாலும் கடுமையாக வாழ்க்கைச் சிக்கலிற்கு ஆளான விவசாயிகள், சிக்கலில் இருந்து விடுபட வழிதெரியாமல் வாழ்வை முடித்துக் கொண்டனர் என்று காரணங்கள் அடுக்கப்பட்டன. மத்திய, மாநில அரசுகள் விவசாயிகளை நெருக்கடியில் இருந்து மீட்க பல திட்டங்களை அறிவித்து செயல்படுத்திவருவதாக செய்திகள் வந்ததற்குப் பிறகும், விவசாயிகன் தற்கொலை செய்து தொடர்கிறது என்பதுதான் அதிர்ச்சியளிக்கிறது.
அப்படியென்றால் அவர்களைக் காப்பாற்றுவதற்காகப் போடப்பட்ட திட்டங்கள் உருப்படியாக அவர்களைச் சென்றடையவில்லையா? என்பதே இந்த விவரம் எழுப்பும் கேள்வியாகும்.
குறுகிய கால உடனடித் தீர்வு அவசியம்!
விவசாயிகள் சந்தித்துவரும் சிக்கல்களில் இருந்து அவர்களை மீட்க தேச வேளாண் ஆணையத்தின் தலைவர் வேளாண் விஞ்ஞானி ம.சா. சுவாமிநாதன் தலைமையிலான குழு, விவசாயிகளை மையப்படுத்தி மேற்கொள்ள வேண்டிய ஒரு உடனடிப் பரிந்துரையை மத்திய அரசிற்கு அளித்தது. ஆனால் அத்திட்டத்தை மத்திய அரசு முழுமையாக ஏற்கவில்லை. விவசாயத்தையும் விவசாயிகளையும் மிகவும் அழுத்தக்கூடிய பிரச்சனையாக கடன் சுமை உள்ளது. அதனை முழுமையாக இறக்கி வைக்க மத்திய, மாநில அரசுகள் முன்வரவேண்டும்.அரசு வங்கிகள், கூட்டுறவு வங்கிகள் ஆகியவற்றிலிருந்து விவசாயிகள் பெற்ற கடன்களின் மீதான வட்டியை மட்டுமே மாநில அரசுகள் தள்ளுபடி செய்கின்றன. விவசாயிகள் எதிர்கொள்ளும் பிரச்சனைகளில் இது பெரிய மாற்றத்தை ஏற்படுத்தாது. அவர்கள் பெற்றுள்ள கடன்கள் முழுவதையும் உடனடியாக ரத்து செய்ய வேண்டும். ரூ.7,000 கோடிக்கு தமிழக அரசால் தள்ளுபடி செய்ய முடியுமென்றால், இன்றைய அளவில் மிகவும் முன்னேறியுள்ள மாநிலமான மராட்டியத்தால் - அதிகமான பாதிப்பிற்கு உள்ளாகியுள்ள விதர்பா பகுதி - விவசாயிகளின் கடன்கள் அனைத்தையும் தள்ளுபடி செய்ய முடியாதா என்ன?கந்து வட்டிக் கடன்களையும் தள்ளுபடி செய்க! மராட்டிய மாநிலம் விதர்பா பகுதியிலும், ஆந்திரத்தின் பல பகுதிகளிலும், மத்தியப் பிரதேசம், சட்டீஸ்காரிலும் விவசாயிகள் தற்கொலைக்குக் காரணம் கந்து வட்டிக் கடன் சுமையே என்பது தெரியவந்துள்ளது. சிறு, சிறு கடன்களையும் அதிக வட்டிக்கு வாங்கியே பலரும் நொடிந்துள்ளனர். அதுவே அவர்களின் தற்கொலைக்கு பெரும்பாலும் காரணாகியுள்ளது தெரியவந்துள்ள நிலையில், கந்து வட்டி பிடியில் இருந்து விவசாயிகளை மீட்க வேண்டுமெனில் அந்தந்த மாநில அரசுகள் அவசர சட்டம் இயற்றி கந்து வட்டிக் கடன்கள் அனைத்தையும் இரத்து செய்திட வேண்டும்.கூட்டுறவுக் கடன்கள் அனைத்தையும் ரத்து செய்து, அதனால் மாநில அரசுகளுக்கு ஏற்படும் சுமையை பாதிக்குப் பாதி மத்திய அரசு ஏற்றுக்கொண்டு ஆதரவளிக்க வேண்டும். இதனை உடனடியாகச் செய்ய வேண்டும். அதற்கான அறிவிப்பை நிதி நிலை அறிக்கையிலேயே வெளியிடவேண்டும். கடன்களின் பிடியில் இருந்து விவசாயிகளை முழுமையாக மீட்காமல், விவசாயத்தையோ விவசாயிகளையோ காப்பாற்றும் வாய்ப்பே இல்லை. இதனை உணர்ந்து அவசர கதியில் மத்திய, மாநில அரசுகள் செயல்படவேண்டும்.
இந்தியாவை அதன் சில நகரங்களில் அல்ல, கிராமங்களில்தான் காண முடியும் என்று மஹாத்மா காந்தி கூறியதை அவரது நினைவு நாளில் விளம்பரமாக வெளியிட்ட மத்திய அரசு, அந்தக் கிராமங்களின் ஜீவனாகத் திகழும் விவசாயத்தையும், விவசாயிகளையும் அதிரடித் திட்டத்தின் மூலம் காத்திட வேண்டும்.
