100
நாட்களுக்கு முன்னர், மே மாதம் 18ஆம் தேதி ஹைதராபாத் நகரின் அடையாளமாக உள்ள சார்மினார் அருகே பழமை வாய்ந்த மெக்கா மஸ்ஜித் எனும் மசூதியில் குண்டு வெடித்து 9 பேர் உயிரிழந்தனர். அதனைத் தொடர்ந்து அப்பகுதியில் நடந்த கலவரத்தை ஒடுக்க காவல்துறையினர் நடத்திய துப்பாக்கிச் சூட்டில் 5 பேர் கொல்லப்பட்டனர்.மெக்கா மஸ்ஜித் குண்டு வெடிப்பிற்கு யார் காரணம்? பின்னணியில் இருந்து செயல்பட்ட பயங்கரவாத இயக்கம் எது? என்று பல்வேறு யூகங்கள்தான் வெளிவந்ததேத் தவிர, அந்த பயங்கரவாத செயலை சதி திட்டம் தீட்டி நிறைவேற்றிய குற்றவாளி என்று ஒருவர் கூட இதுவரை கைது செய்யப்படவில்லை!இந்த நிலையில் தான் ஹைதராபாத்தில் நேற்று இரவு மக்கள் அதிகம் கூடும் லும்பினி பூங்காவில் சக்தி வாய்ந்த குண்டு வெடித்தது. பொதுவாக அந்த பூங்காவில் 1,500 முதல் 2,000 பேர் வரை கூடுவார்களாம். நேற்று 400 பேர் மட்டுமே அங்கு இருந்துள்ளனர். எனவே குண்டு வெடிப்பில் உயிரிழந்தோர் எண்ணிக்கை பத்தோடு போய்விட்டது.
ஆனால் அருகில் இருந்த கோகுல் துரித உணவகத்தில் மக்கள் அதிகமாக இருந்த நேரத்தில் குண்டு வெடித்ததில் 32 பேர் கொல்லப்பட்டுள்ளனர். படுகாயங்களுடன் மருத்துவமனையில் அனுமதிக்கப்பட்ட மேலும் 5 பேர் உயிரிழந்தனர்.
இந்த தாக்குதல்கள் அனைத்தும் மிகவும் திட்டமிடப்பட்டு, மக்களிடையே அச்சத்தையும், பிளவையும் ஏற்படுத்த நடத்தப்பட்டுள்ளது என்பது நன்கு புலனாகிறது.
ஹைதராபாத்தில் பாதசாரிகள் நடக்கும் தில்சுக் நகர் மேம்பாலத்தில் நேர வெடிகுண்டு ஒன்று கண்டுபிடிக்கப்பட்டுள்ளது. அதுவும் வெடித்திருந்தால் உயிரிழப்பு மிக அதிகமாகி இருக்கும். இதற்காக ஹைதராபாத் காவல்துறையை பாராட்டலாம்.
மக்களை அச்சுறுத்தி, சமூகத்தில் பிளவை ஏற்படுத்தும் நோக்குடன் பயங்கரவாதிகள் தாக்குதல் நடத்துவார்கள் என்று உளவு தகவல்கள் அறிவுறுத்தியதற்குப் பிறகும் இப்படிப்பட்ட தாக்குதல்கள் தொடர்வது நமது சட்டம்-ஒழுங்கு அமைப்புகளின் திறமைகளை கேள்விக் குறியாக்குவது மட்டுமின்றி, நமது அரசுகளின் நிர்வாகத் திறனையும் சந்தேகத்திற்குட்படுத்துகிறது.
வெள்ளிக்கிழமை தொழுகைக்காக ஏராளமான மக்கள் மசூதியில் கூடியிருந்தபோது நடந்த குண்டுவெடிப்பைத் தொடர்ந்து தீவிரமான புலனாய்வு செய்து குற்றவாளிகளை கண்டுபிடித்து சட்டத்தின் முன் நிறுத்தியிருந்தால் நேற்று நடந்த இந்த தாக்குதல்கள் தவிர்க்கப்பட்டிருக்கலாம்.
எஃப்.பி.ஐ.யும், சி.பி.ஐ.யும்!
2001ஆம் ஆண்டு செப்டம்பர் 11ஆம் தேதி நியூயார்க் நகரில் நடந்த பயங்கரவாத தாக்குதலுக்குப் பின்னர் அந்நாட்டிற்குள் மீண்டும் அப்படிப்பட்ட பயங்கரவாத தாக்குதல் ஏதும் நடக்காமல் தடுக்கப்பட்டதற்கு காரணம் அந்நாட்டு புலனாய்வு அமைப்பான எஃப்.பி.ஐ.யின் தீவிர நடவடிக்கையே காரணம் என்பதை கருத்தில் கொள்ள வேண்டும். அதனால்தான் எவ்வளவோ தாக்குதல் எச்சரிக்கைகளை அல் கய்டா விடுத்தாலும் அமெரிக்காவில் எந்த தாக்குதலும் நடைபெறவில்லை. காரணம் அந்நாட்டு புலனாய்வு அமைப்பு. அயல்நாட்டு உளவு அமைப்பான சி.ஐ.ஏ.யின் உதவியுடன் தீவிரமாக கண்காணித்து வருகிறது.
இப்படிப்பட்ட நிலை இந்தியாவில் இல்லை. நமது மத்தியப் புலனாய்வுக் கழகத்திற்கு ஊழல் கண்டுபிடிப்பு வேலைகளும், அந்தந்த மாநில காவல்துறை செய்ய வேண்டிய குற்ற புலனாய்வுமே பெரிதாக உள்ளது,
மத்திய புலனாய்வுக் கழகம் இப்படிப்பட்ட தேவையற்ற தளைகளில் இருந்து விடுவிக்கப்பட்டு பயங்கரவாதத்தை ஒடுக்கும் முக்கியப் பணியை அளிக்க வேண்டும். பயங்கரவாதத்தை முழுமையாக ஒடுக்க வேண்டுமெனில் சிபிஐ-யிடம் இப்பொறுப்பு அளிக்கப்பட வேண்டும்.
டெல்லி, மும்பை, ஹைதராபாத், பெங்களூர் என்று நமது நாட்டின் முக்கிய நகரங்கள் அனைத்திலும் தொடர்ந்து திட்டமிட்டு தாக்குதல் நடத்தி வரும் பயங்கரவாதிகளையும், அவர்களைப் பின்னணியில் இருந்து இயக்கும் உள்நாட்டு, அயல்நாட்டு சக்திகளையும் அடையாளம் கண்டு அகற்ற வேண்டியது மத்திய அரசின் (உள்துறை அமைச்சகத்தின்) தலையாய நடவடிக்கையாகும்.
பயங்கரவாத நடவடிக்கைகள் சட்டம் ஒழுங்கு பிரச்சினைகள் அல்ல. நமது தேசத்தின் ஒற்றுமைக்கும், இறையாண்மைக்கும் ஜனநாயக நெறிமுறைகளுக்கும், சமூக நல்லிணக்கத்திற்கும் எழுந்துள்ள அச்சுறுத்தல். எனவே மத்திய அரசே தீவிர நடவடிக்கை எடுக்க வேண்டும்.
உடனடியாக மத்திய அரசு விழித்துக் கொள்ள வேண்டும். இல்லையெனில் சென்னையும் தூரமில்லை...
