இந்திய - அமெரிக்க அணு சக்தி ஒத்துழைப்பை தங்களால் ஏற்க முடியாது என்றும், அது தொடர்பாக அரசு மேற்கொண்டு எந்த நடவடிக்கையையும் மேற்கொள்ளக்கூடாது என்றும், மீறினால் மோசமான விளைவுகளை சந்திக்க நேரிடும் என்று மார்க்சிஸ்ட் கட்சி கூறியிருப்பது மத்திய அரசிற்கு அரசியல் ரீதியான நெருக்கடியை உருவாக்கியுள்ளது!இந்திய - அமெரிக்க அணு சக்தி ஒத்துழைப்பு நமது நாட்டின் எதிர்கால எரிசக்தித் தேவையைக் கருத்தில் கொண்டே முன்னெடுக்கப்படுகிறது என்று பிரதமரும், நமது அணு உலைகளுக்குத் தேவையான எரிபொருளைப் பெற இந்த ஒத்துழைப்பு அவசியமானது என்று நமது விஞ்ஞான சமூகமும் உறுதியாகக் கூறிவிட்ட நிலையில், சற்றேறக்குறைய இரண்டு ஆண்டுகளாக பேச்சுவார்த்தை நடத்தி அதனை நடைமுறைப்படுத்துவதற்கான 123 ஒப்பந்தம் இறுதி செய்யப்பட்டுள்ள நிலையில் மார்க்சிஸ்ட் கட்சி மத்திய அரசிற்கு இப்படிப்பட்ட நெருக்கடியை ஏற்படுத்தியுள்ளது.
மத்திய அரசிற்கு வெளியில் இருந்து ஆதரவு அளித்துவரும் மார்க்சிஸ்ட் உள்ளிட்ட இடதுசாரி கூட்டணிக் கட்சிகள், அமெரிக்காவுடனான அணு சக்தி ஒத்துழைப்பை எதிர்ப்பதற்கு கூறிவரும் காரணங்கள் அனைத்தும் பிரதமர் மட்டுமின்றி, அணு சக்தி ஆணையத்தின் தலைவர் அனில் ககோட்கரும் விளக்கமளித்துள்ளனர். நாளை நாடாளுமன்றத்தில் விதி எண் 193ன் கீழ் விவாதம் நடந்த பிறகு இறுதியாக மீண்டும் பிரதமர் விளக்கம் அளிக்க உள்ளார்.
ஆனால், அதுவரையெல்லாம் காத்திருக்காமல், அமெரிக்காவுடனான அணு சக்தி ஒத்துழைப்பை முற்றிலுமாக நிராகரிக்க வேண்டும் என்றும், மீறினால் மோசமான விளைவுகளைச் சந்திக்க நேரிடும் என்றும் மார்க்சிஸ்ட் கம்யூனிஸ்ட் கட்சி மிரட்டியிருப்பது, கொள்கை ரீதியான கண்மூடித்தனமான நடவடிக்கையாகவே தெரிகிறது.
"நாங்கள் மார்க்சிஸ்ட்டுகள், எங்களால் ஏகாதிபத்திய அமெரிக்காவுடனான எந்தவித ஒப்பந்தத்தையும் ஜீரணிக்க முடியாது" என்றுதான் இவர்கள் சொல்லாமல் சொல்லியுள்ளார்கள். இவர்களுடைய நிலைப்பாட்டில் இந்த நாட்டின் எதிர்கால எரிசக்தித் தேவைக்கான கேள்விக்கு பதில் இல்லை. இருந்திருந்தால் நிச்சயம் அதனை நாடாளுமன்றத்தில் எடுத்து வைத்திருப்பார்கள். இப்படி அரசியல் தலைமைக் குழுவைக் கூட்டி விவாதித்து தான்தோன்றித்தனமாக முடிவெடுத்திருக்க மாட்டார்கள்.
தங்களுடைய ஏகாதிபத்திய எதிர்ப்பை கைவிட முடியாமல், பழைய கொள்கை பாரம்பரியத்தில் சிக்கித் தவித்துக் கொண்டிருக்கும் மார்க்சிஸ்ட்டுகள் ஒன்றை உணரவேண்டும். கம்யூனிஸ்ட் நாடான சீனா, தனது எரிசக்தித் தேவைக்காக இன்றல்ல, நேற்றல்ல 22 ஆண்டுகளுக்கு முன்னரே, 1985 ஆம் ஆண்டு அமெரிக்காவுடன் இதேபோல 123 ஒப்பந்தத்தில் கையெழுத்திட்டு தனது அணு உலைகளுக்கு எரிபொருளைப் பெற்று வருகிறது. அந்நாட்டின் கம்யூனிஸ்ட்டுகளுக்கு தங்கள் நாட்டின் தேவைகளுக்கு என்ன செய்வது என்பது புரிந்திருக்கிறது. ஏனென்றால் அவர்கள் அங்கு ஆட்சியில் இருக்கின்றார்கள். எனவே, கொள்கையைத் தாண்டி பொறுப்புணர்வுடன் திட்டமிடுகிறார்கள். இந்த அணு சக்தி ஒத்துழைப்பினால் இந்தியாவை வளைக்கப் பார்க்கிறது அமெரிக்கா என்ற மார்க்சிஸ்ட்டுகளின் கூற்றுப்படி பார்த்தால், 22 ஆண்டுகளுக்கு முன்னர் அணு ஒத்துழைப்பு செய்து கொண்ட சீனா எந்தவிதத்திலும் அமெரிக்காவிற்கு அடிபணிந்ததாகத் தெரியவில்லை. இப்படிப்பட் நிலையில் இந்தியாவை தன் வசதிக்கு அமெரிக்கா வளைக்கும் என்று மார்க்சிஸ்ட்டுகள் கூறுவது எந்தவிதத்திலும் ஏற்றுக்கொள்ளத்ததக்காத இல்லை. நமது நாட்டு கம்யூனிஸ்ட்டுகளுக்கு இரண்டு மாநிலங்களைத் தாண்டி எந்தப் பொறுப்பும் இல்லை. அங்குள்ள செல்வாக்கைப் பயன்டுத்தி தற்பொழுது மத்திய அரசை மிரட்டுகின்றனர். மேற்கு வங்க முதலமைச்சர் முதலாளித்துவ எதிர்ப்பையெல்லாம் தூரத்தில் தூக்கி வைத்துவிட்டு டாட்டாக்களுக்கு இடமளித்து தொழில்துறையை முன்னேற்ற விரும்புகிறார். ஆனால், இந்தப் பார்வை அந்தக் கட்சிகளின் அகில இந்தியத் தலைமைகளுக்கு இல்லாமல் போனதுதான் துரதிருஷ்டவசமானது.
அமெரிக்காவுடனான அணு சக்தி ஒப்பந்தம் நாம் மேற்கொண்டுவரும் 3 கட்ட அணு சக்தித் திட்டத்திற்கு எந்தவிதத்திலும் தடையாக இல்லை என்றும், நமது எதிர்கால பாதுகாப்பைக் கருத்தில் கொண்டு அணு ஆயுதச் சோதனை நடத்துவதற்கு தடையாக இருக்க முடியாது என்றும் அணு சக்தி ஆணையத்தின் தலைவர் அனில் ககோட்கர் நேற்று முன்தினம் கூட தெளிவாகக் கூறியிருந்தார்.
அதுமட்டுமின்றி, ஒரு வேளை நமது தேசத்தின் பாதுகாப்பிற்கு அச்சுறுத்தல் ஏற்பட்டு அதன் அடிப்படையில் நாம் அணு ஆயுதச் சோதனை நடத்தினாலும் கூட, அணு சக்தி ஒத்துழைப்பை முறித்துக் கொள்வதற்கு முன் அது தொடர்பாக இரு நாடுகளுக்கும் இடையே பேச்சுவார்த்தையும், அப்படிப்பட்ட சோதனைக்கான சூழ்நிலைகளும் ஆராயப்படும் என்று 123 ஒப்பந்தத்தில் தெளிவுபடுத்தப் பட்டிருப்பதையும் ககோட்கர் சுட்டிக் காட்டியுள்ளார். இதையெல்லாம் மார்க்சிஸ்ட்டுகள் கண்டுகொள்ளவில்லை.
நமது அயலுறவுக் கொள்கையில் அமெரிக்காவின் தலையீடு அதிகரிக்கும் என்றும், அமெரிக்க வகுத்துவரும் உலகளாவிய ராணுவ திட்டத்தில் நம்மை வலிமையாக இணைக்கவே இந்த ஒப்பந்தத்தின் மூலம் அமெரிக்கா முயற்சிக்கிறது என்றும், அடிப்படையற்ற வாதங்களை மார்க்சிஸ்ட் கட்சிகள் முன்வைக்கின்றன.
இது தொடர்பாக சில நாட்களுக்கு முன் வெளியிட்டிருந்த கட்டுரையில் ஒன்றைத் தெளிவுபடுத்தியிருந்தோம். அணு சக்தித் தேவைக்காக சர்வதேச அளவில் எரிபொருளைத் திரட்ட நமக்கு இந்த ஒப்பந்தம் அவசியமானது. அதேபோல, சர்வதேச அரசியல் மற்றும் வணிக ரீதியில் அமெரிக்காவிற்கு இந்தியா தேவைப்படுகிறது என்று கூறியிருந்தோம். இதனால்தான் இந்த ஒப்பந்தம் இருதரப்பிற்கும் சாதகமானது என்றும், எந்தவிதத்திலும் ஒரு வழிப்பாதையாகாது என்று பிரதமரும் விளக்கியிருக்கிறார்.
அமெரிக்காவிடம் இருந்து மட்டுமல்ல, நமது நட்பு நாடாக இருந்துவரும் ரஷ்யாவிடம் இருந்து கூட அணு எரிபொருளையும், உயர் தொழில்நுட்பத்தையும் பெறவேண்டுமெனில் அதற்கு இந்த ஒப்பந்தம் அவசியமானது என்று இந்தியாவிற்கு ரஷ்யா வலியுறுத்தியுள்ளதையும் கருத்தில் கொள்ள வேண்டும். ஆஸ்ட்ரேலியாவில் இருந்து எரிபொருளையும், என்.எஸ்.ஜி. என்றழைக்கப்படும் அணு உயர் தொழில்நுட்ப உபகரணங்களை விற்கவல்ல நாடுகளுடன் ஒப்பந்தம் செய்துகொள்ளவும் இந்த ஒப்பந்தம் அவசியமானது. எனவே, அடிப்படையில் இருதரப்பு ஒப்பந்தமாக இருந்தாலும், இந்த ஒப்பந்தம் சர்வதேச அளவில் நமது தேவைகளுக்கான முக்கிய திறவாகும். இதையெல்லாம் மார்க்சிஸ்ட் கட்சிகள் கணக்கிலும் எடுத்துக்கொள்ளவில்லை, கருத்திலும் கொள்ளவில்லை. அவர்களுடைய கண்களை கண்மூடித்தனமான கொள்கைப் பிடிப்பு மறைத்துவிட்டதாகவே தெரிகிறது.
இப்பிரச்சனையில் தேசத்தின் நலன் கருதி மத்திய அரசு முடிவெடுக்க வேண்டும். ஆட்சிக்கு ஆதரவு இல்லை என்று அறிவித்தாலும் சரி, அணு சக்தி ஒத்துழைப்பு ஒப்பந்தத்தை ஏற்றுக்கொள்வது என்ற முடிவில் இருந்து மத்திய அரசு பின்வாங்கக் கூடாது.
ஏனெனில், இன்னும் 20 ஆண்டுகளில் நமது எரிசக்தித் தேவை பன்மடங்கு அதிகரிக்கக்கூடிய நிலையில், அணு மின் நிலையங்களின் எண்ணிக்கையை அதிகப்படுத்தி, அணு மின் உற்பத்தியை பெருக்கவும் அத்தியாவசியமானது சர்வதேச ஒத்துழைப்பு. அதற்கு வழி செய்யும் அமெரிக்காவுடனான ஒப்பந்தத்தை எந்த எதிர்ப்பானாலும் அதனை புறந்தள்ளிவிட்டு மத்திய அரசு ஏற்க வேண்டும்.
