கல்வியை கேலிக்கூத்தாக்கும் சுயநிதிக் கல்லூரிகள்!

தமிழ்நாட்டில் இயங்கிவரும் சுயநிதி பொறியியல், மருத்துவக் கல்லூரிகள் மாணாக்கர்களிடம் வசூலித்து வரும் கட்டணமும், மற்ற நன்கொடைகளும் இன்றைக்கு அரசியல் பிரச்சனையாக்கப்பட்டு ஆளும் கூட்டணிக்குள் விரிசல் ஏற்படுமோ என்று எண்ணுமளவிற்கு விஸ்வரூபம் எடுத்துள்ளது!

tn.gov

சுயநிதி கல்லூரிகளின் நிர்வாகங்கள் மாணவர்களிடம் கல்விக் கட்டணமாகவும், கட்டட நிதி, அந்த நிதி, இந்த நிதி என்று ரசீது கொடுக்காமல் அடித்துவரும் கொள்ளை ஊரறிந்த உண்மையாக இருந்துவரும் நிலையில், அதற்கு ஆதாரம் அளித்தால் நடவடிக்கை எடுப்போம் என்று பா.ம.க. தலைவரிடம் உயர்கல்வி அமைச்சர் பொன்முடி கேட்டிருப்பது விவரம் தெரிந்த அனைவருக்கும் ஆச்சரியத்தைதான் ஏற்படுத்தியிருக்கிறது.

சுயநிதி கல்லூரிகள் ஒவவொன்றிலும் பொறியியல் படிக்க இவ்வளவு, மருத்துவம் படிக்க இவ்வளவு, ஆளுமை கல்வி கற்க இவ்வளவு என்று ஒவ்வொரு ஆண்டும் பட்ஜெட்டில் அறிவிப்புகளை வெளியிடுவது போல, வெளிப்படையாகவே கூறி வசூல் வியாபாரம் செய்து வருகின்றனர்.

இந்த தனியார் கல்லூரியில் நன்கொடை என்றோ, கூடுதலாகவோ ஏதும் வசூலிப்பது இல்லை என்று கூறிடும் அளவிற்கு தமிழ்நாட்டில் மிகப் பெரும்பாலான சுயநிதி கல்லூரிகள் இல்லை என்பதை உயர் கல்வி அமைச்சர் பொன்முடி புரிந்துகொள்ள வேண்டும்.

யதார்த்தத்தை மறுத்துவிடுவதாலோ, ஆதாரம் இல்லை என்பதாலோ நடந்து கொண்டிருக்கின்ற ஒரு பகல் கொள்ளை இல்லாமல் ஆகிவிடாது. பெற்றோர்களுக்கும், மாணாக்கர்களுக்கும் வெள்ளிடை மலையாகத் தெரியும் ஒரு உண்மை அரசிற்கு தெரியாது என்பது ஏற்றுக்கொள்ளத்தக்கதல்ல.

அரசிற்கு ஆதாரவான தமிழ் தொலைக்காட்சி ஒன்றில் ஒவ்வொரு வாரமும் நடத்தப்படும் நேர்காணல் நிகழ்ச்சியில் கலந்துகொண்டு பேசிய தமிழ்நாட்டின் முன்னணி கல்வியாளர்களில் ஒருவரும், முன்னாள் துணை வேந்தருமான ஒருவர், "சென்னைக்கு அருகில் பல கல்லூரிகளை நடத்திவரும் தனியார் நிர்வாகம் ஒன்று ஒவ்வொரு ஆண்டும் மாணாக்கர் சேர்க்கையில் ரூ.30 கோடி வரை வசூலித்து வருகிறது" என்று பட்டவர்த்தனமாக கூறினார்.

சில மாதங்களுக்கு முன்பு இப்படிப்பட்ட சுயநிதி கல்லூரிகளை நடத்தி வருவோர் வீடுகளிலும், அலுவலகங்களிலும் வருமான வரித்துறையினர் சோதனை நடத்தி லட்சக்கணக்கில் ரொக்கத்தையும், ஏராளமான சொத்து ஆவணங்களையும் கைப்பற்றியுள்ளனர்.

உண்மை இவ்வாறிருக்க, தமிழ்நாட்டில் தொழில் கல்வியை முறைப்படுத்தி சீர்மைபடுத்தும் தனிப் பொறுப்பை ஏற்றுள்ள உயர் கல்வி அமைச்சர் ஆதாரம் கேட்பது நியாயமாகப்படவில்லை. உண்மையை சுலபமாகத் தெரிந்துகொள்ளும் அதிகாரத்தை வைத்துக் கொண்டு, மற்றவர்களை ஆதாரம் தருமாறு கேட்பது, தவறை மறைக்கும் அரசியலே தவிர, அதில் மக்கள் நலன் சற்றுமில்லை.

சுயநிதிக் கல்லூரிகள் நடத்திவரும் கல்விக் கொள்ளைகளை ஏராளமானோர் எடுத்துக் கூறிவிட்டனர். கடைசியாகக் கூறுபவர்தான் பா.ம.க. நிறுவனர் ராமதாஸ் என்பதை நினைவில் கொள்ள வேண்டும்.

கல்வியை காப்பாற்ற வேண்டும்!

தமிழ்நாட்டில் மட்டுமல்ல, இந்தியா முழுவதும் உயர் கல்வி தனியாரிடம் சிக்கி அல்லல்பட்டு வருகிறது. கல்வி இன்றைக்கு மிகப்பெரிய வியாபாரமாக நடந்து வருகிறது. அப்பட்டமான பகல் கொள்ளை அதிகாரப்பூர்வமாக நடந்து வருகிறது. யார் தடுப்பது? உயர் கல்வியை காப்பாற்றப் போவது யார்?

இன்றைய நிலை தொடர்ந்தால் கல்விக்கு மதிப்பேதும் இராது. ஒருபக்கம் சமூகத்தின் அனைத்து தட்டு மாணாக்கர்களுக்கும் உயர் கல்வி கிட்ட வேண்டும் என்பதற்காக சமூக நீதியை சட்டப்பூர்வமாக்கி நடைமுறைப்படுத்த ஒரு சட்டப் போராட்டமே நடத்திக் கொண்டிருக்கும் வேளையில், மற்றொருபுறம் உயர் கல்வி வணிகமாகிக்கொண்டே போவதை அனுமதிப்பது ஒன்றிற்கு ஒன்று முரண்பட்ட செயலாகும்.

சமூக நீதியை நடைமுறைப்படுத்தி உயர் கல்வியை அனைத்து சமூகத்தினரும் பெற்றிட பாடுபடும் மத்திய, மாநில அரசுகள், அதே உயர் கல்வி தனியாரிடம் சிக்கி கொள்ளைக் கருவியாக்கப்படுவதை தடுத்து நிறுத்த தயங்குவது ஏன்? இந்தக் கேள்விக்கு செயல் ரீதியாக பதிலளிக்க வேண்டிய கட்டாயம் மத்திய, மாநில அரசுகளுக்கு உண்டு.

பொறியியல், மருத்துவ படிப்புகளுக்கு இவ்வளவுதான் கட்டணம் வசூலிக்க வேண்டும் என்று தமிழக அரசு நிர்ணயித்தது. ஆனால், அதை எந்த சுயநிதிக் கல்லூரியும் கடைபிடிக்கவில்லை என்கின்ற உண்மை தெரியும்போது, அரசின் கட்டளைகள் கடைபிடிக்கப்படாததற்கு காரணம் என்ன? என்ற கேள்வியும் எழுகிறது.

உயர் கல்வி மட்டுமல்ல, ஒட்டுமொத்தமாக கல்வியை தனியாரின் பிடியில் இருந்து மீட்டு அரசாங்கமே அனைத்து கல்வி நிலையங்களையும் ஒவ்வொன்றிற்கும் தேவைப்படும் தரத்துடன் உருவாக்கி கல்வியின் தரத்தைக் காப்பாற்ற வேண்டும். அந்த இலக்கை நோக்கி மத்திய, மாநில அரசுகள் செயல்பட வேண்டும்.

முதற்கட்டமாக சுயநிதி கல்லூரிகளில் ஒவ்வொரு படிப்பிற்கும் அரசு நிர்ணயித்த கட்டணம்தான் வசூலிக்கப்படுகிறதா என்பதனை அரசு கடுமையாக கண்காணிக்க வேண்டும். முறை தவறி செயல்படும் 10, 15 கல்லூரிகளின் அனுமதியை ரத்து செய்து மற்ற கல்லூரிகளுக்கு அதிர்ச்சியைத் தரவேண்டும்.

தமிழக அரசு இப்பிரச்சனையை அரசியல் கண்ணோட்டத்துடன் நோக்காமல் சமூக, கல்வி நோக்குடன் பார்த்து செயல்பட வேண்டும். அப்பொழுதுதான் இது மக்களின் எண்ணங்களைப் பிரதிபலிக்கும் அரசாக இருக்கும்.