இந்திய மொழி இணையத் தளங்களில் தனக்கென்று ஒரு இடத்தை தரத்துடன் பிடித்து, நம்பகத்தன்மையுடன் இன்று வரை உலகெங்கிலும் வாழும் தமிழ் மக்களிடையே தமிழ்.வெப்துனியா.காம் பரவியிருக்கிறதென்றால் அதற்குக் காரணமாக இருந்துவரும் எமது இணைய வாசிகளான உங்களுக்கு நாங்கள் நன்றி செலுத்துகிறோம்.2000
வது ஆண்டில் சித்திரைப் புத்தாண்டுத் தினத்தன்று துவக்கப்பட்ட வெப்உலகம்.காம் எனும் எமது பன்முகத் தளம், வணிக ரீதியான சோதனைகள் பலவற்றைத் தாண்டி இன்றுவரை தொடர்ந்து நீடித்து வருவதற்கு உங்களின் எல்லையில்லா அபிமானமும் ஆதரவுமே காரணம் என்பதை நாங்கள் நன்கு உணர்ந்துள்ளோம்.
செய்திகள் முதல் சினிமா வரை, விளையாட்டிலிருந்து ஜோதிடம் வரை, சமையல் குறிப்பிலிருந்து ஆன்மிகம், சுற்றுலா என்று உங்களின் ஒவ்வொரு தேவையையும், எதிர்பார்ப்பையும் இயன்ற அளவிற்கு தரத்துடன் நிறைவு செய்திருக்கிறோம் என்று நம்புகிறோம்.
ஒன்றரை ஆண்டுகளுக்கு முன்னர் வெப்உலகம்.காம் என்றிருந்த எமது இணையத் தளம், தமிழ்.வெப்துனியா.காம் என்று பெயர் மாற்றம் பெற்றது மட்டுமின்றி, டைனமிக் கோடில் இருந்து யுனிகோடிற்கு மாறியது எமது பன்முகத் தளத்தை மேலும் விரிவாக உலகத் தமிழர்கள் மத்தியில் கொண்டு சென்றது.
அதுவரை 4 இந்திய மொழிகளில் - தமிழ், இந்தி, மலையாளம், தெலுங்கு - மொழிகளில் மட்டுமே வந்த எமது இந்திய மொழி இணையத் தளங்கள், கன்னடா, மராத்தி, குஜராத்தி, பஞ்சாபி, வங்காளி மொழிகளிலும் அறிமுகப்படுத்தப்பட்டது. இதன் மூலம் 9 இந்திய மொழிகளில் இணையத் தளங்களை வழங்கும் ஒரே நிறுவனமாக எமது வெப்துனியா உயர்ந்தது.
இந்தியாவும், தமிழ்நாடும் எதிர்கொள்ளும் பல முக்கிய பிரச்சனைகளை ஆழத்துடன் அலசி அழுத்தமான விவரங்களை அளித்தது தமிழ்.வெப்துனியா.காம். அதிலும் குறிப்பாக சமீப காலங்களில் ஈழத் தமிழர்கள் படும் அல்லலையும் அதனை தங்களின் பொருளாதார, வணிக நலன்களை உள்ளடக்கிப் பார்க்கும் உலக நாடுகளின் நிலையையும் விவரமாக எடுத்துரைத்தது தமிழ்.வெப்துனியா.காம்.
செய்திகளை மட்டுமே கொடுத்துவிட்டு கடமை முடிந்தது என்று மூடிக்கொள்ளாமல், செய்திகள் மற்றும் நிகழ்வுகளின் பின்னணியை ஆழமாக ஆராய்ந்து அதனை வாசகர்களின் பார்வைக்கு வைத்தது தமிழ்.வெப்துனியா.காம்.
வணிகப் பகுதியில் பங்குச் சந்தையில் இருந்து தொழில் துறை வரை முக்கிய செய்திகளையும், தங்கம், வெள்ளி உட்பட சந்தை நிலவரங்களையும் ஒவ்வொரு நாளும் உரிய நேரத்தில் வழங்கி பயனாளர்களை விவரப்படுத்தியது.
சினிமா பகுதி மிகச் சிறப்பாக விரிவுபடுத்தப்பட்டது. ஜோதிடப் பகுதி அதன் அனைத்துப் பரிமாணங்களையும் உள்ளடக்கியதாக விரிவாக்கப்பட்டது. பொருட்செரிவிற்கு அதிக முக்கியத்துவம் அளித்தது தமிழ்.வெப்துனியா என்பதை வாசகர்களாகிய உங்களுக்கு நாங்கள் கூறத் தேவையில்லை.
விளையாட்டிற்கு எப்போதும் முக்கியத்துவம் அளித்துவரும் வெப்துனியா.காம், ஒலம்பிக் போட்டிகளில் இருந்து டெஸ்ட் மற்றும் ஒரு நாள் சர்வதேச கிரிக்கெட் போட்டிகள் வரை துல்லியமாக விவரங்களை உங்களுக்கு வழங்கியதை அறிவீர்கள்.
இப்படி ஒவ்வொரு துறையையும் மிகுந்த கவனத்துடன் தரும் தமிழ்.வெப்துனியா.காம் இனி வரும் ஆண்டில் மேலும் பல பயனுள்ள விவரங்களை கூடுதலாக உங்களுக்கு வழங்கும் என்பதைத் தெரிவித்துக் கொள்கிறோம்.
ஈடிணையற்ற உங்களின் ஆதரவும் ஊக்கமும் இருக்கும் வரையில் தமிழில் உண்மையான ஒரு பன்முகத் தளமாக தமிழ்.வெப்துனியா.காம் என்றென்றும் நீடிக்கும் என்பதை இந்த நேரத்தில் நன்றியுடன் கூறிக்கொள்கிறோம்.
