''
சினிமா பார்த்து, பார்த்து அந்த ஆர்வம் காரணமாக திரையுலகத்துக்குள் வந்து சேர்ந்தேன்'' என்று தன்னை அறிமுகம் செய்து கொள்கிறார் ராஜா ஆறுமுகம். இயக்குநர் கே.எஸ்.அதியமானிடம் உதவி இயக்குநராகப் பணி புரிந்த இவரின் முதல் படம் மஞ்சள் வெயில். ஜூலையில் வெளிவரவிருக்கும் தனது படம் பற்றி வெப்துனியாவிற்காக இயக்குநர் ராஜா ஆறுமுகத்தின் பேட்டி...''
மஞ்சள் வெயில்'' கதை பற்றி...காதலுக்கும் நட்புக்கும் இடையே நடக்கின்ற விஷயங்களைச் சொல்லப்போகிற படந்தான் மஞ்சள் வெயில். ஒவ்வொரு அம்சமும் ஒவ்வொருத்தருக்கு பிடித்து, மொத்தத்தில் எல்லோரும் பாராட்டும் படமாக இது அமையும். காதல், குடும்பம், நட்பு என அனைத்தும் கலந்த ரெகுலர் கமர்ஷியல் படந்தான் எனது ''மஞ்சள் வெயில்''படத்தின் நடிக, நடிகைகள்...
பிரசன்னா, பாலா, சந்தியா, எம்.எஸ். பாஸ்கர், ஆர்.கே. ('தூண்டில்' வில்லன்) நடித்துள்ளனர். சையது இப்ராஹிம் தயாரித்துள்ள முதல் படம் என்பது இன்னொரு குறிப்பிடத் தகுந்த விஷயம்.
''மஞ்சள் வெயில்'' இந்த தலைப்பு பற்றி...
ரம்மியமான விஷயம்தானே மஞ்சள் வெயில். மனதுக்கு, உடலுக்கு இதந்தரக்கூடிய மாலை நேரத்து மஞ்சள் வெயிலைப் போன்றே கதை பயணிக்கிறது. மொத்த குடும்பமும் உட்கார்ந்து நெளியாமல், தர்மசங்கடமாய் உணராமல் ஒரு நல்ல படம் தர வேண்டும் என்ற எனது எண்ணமே இந்த படமும். அதன் தலைப்பும் தரும் செய்தி. மஞ்சள் வெயில் தலைப்பு பற்றி சில காட்சிகளையும் படத்தில் வைத்துள்ளோம். அந்தப் பகுதிகள் ரசிகர்களை நிச்சயம் வெகுவாகக் கவரும்.
பாடல்கள் எத்தனை? ரீமிக்ஸ் உண்டா?
ஆறு பாடல்கள். ரீமிக்ஸ் பாடல் இல்லை மொத்தப் பாடலையும் பா. விஜய் எழுதியுள்ளார். பரத்வாஜ் இசையில் காதல் வரிகளுக்கேற்ற சுத்தமான பாடல்கள். இசையமைப்பாளர் பரத்வாஜ், கதாநாயகி சந்தியாவுடன் இணைந்து ஒரு டூயட்பாடலையும். பாடகி ஹரிணியுடன் இணைந்து ஒரு பாடலையும் பாடியுள்ளார்.
பேங்காக்கில் ஒரு பாடலும், ஊட்டி எமரால்டு தேயிலைத் தோட்டத்தில் ஒரு பாடலும் படமாக்கப்பட்டுள்ளன. 'ஆசை ஓவியம்' பாடல் அனைத்து தரப்பு ரசிக உதடுகளில் முணுமுணுப்பாக உள்ளது மகிழ்ச்சியாக உள்ளது.
மற்ற கலைஞர்கள் குறித்து...
மஞ்சள் வெயிலை ஒளிப்பதிவு செய்துள்ளவர் கவியரசு. முன்பு கூறியபடி தயாரிப்பு சையது இப்ராஹிம். தேவையான இடத்தில், தேவைக்கேற்ப சண்டை காட்சிகளை அமைத்துள்ளார் தளபதி தினேஷ். எனது இந்த படத்துக்காக அனைத்து தரப்பு கலைஞர்களும் கொடுத்த ஆதரவு மறக்கவோ, மறுக்கவோ முடியாத ஒன்று.
படம் முடிவடைந்துள்ள நிலையில் எப்படி உணர்கிறீர்கள்?
ஒரு நல்ல கதையம்சமுள்ள, கமர்ஷியல் தரத்துடன் உள்ள ஒரு படத்தை எடுத்து தமிழ் மக்களின் கையில் தரப் போகிறேன். அந்த படத்தை வெற்றிப் படமாக்கி தருவார்கள் என்ற மிகுந்த நம்பிக்கையுடனும், எதிர்பார்ப்புடனும் காத்திருக்கிறேன். ''மஞ்சள் வெயில்'' நல்ல பெயரையும், நல்ல மதிப்பையும் எனக்குப் பெற்றுத்தரும் என்பது எனது நம்பிக்கை.
இந்தப் படத்தை நான் இயக்க காரணமாக இருந்த இயக்குநர் கே.எஸ்.அதியமான் அவர்களுக்கு மிகுந்த நன்றியுணர்வோடு எனது நெகிழ்வை உரித்தாக்குகின்றேன்.
