ரஷ்ய கடற்படையின் துணை தலைவர் படுகொலை.. உக்ரைன் எல்லையில் இருந்த பிணம்..!

உக்ரைனுடன் ரஷ்யா நடத்தி வரும் போரில் ரஷ்ய கடற்படையின் துணைத் தலைவரான மேஜர் ஜெனரல் மிகைல் குட்கோவ், உக்ரைன் எல்லையை ஒட்டியுள்ள ரஷ்யாவின் குர்ஸ்க் மாகாணத்தில் சுட்டுக்கொல்லப்பட்டுள்ளார். ரஷ்ய பாதுகாப்புத் துறை இந்த தகவலை உறுதிப்படுத்தியுள்ளது.

"போர் நடவடிக்கைகளின்போது" ஜெனரல் குட்கோவ் கொல்லப்பட்டதாக ரஷ்யா கூறியிருந்தாலும், இந்த சம்பவம் குறித்த முழுமையான விவரங்கள் இன்னும் வெளியிடப்படவில்லை. குர்ஸ்க் மாகாண ஆளுநர் அலெக்ஸாண்டர் கின்ஷ்டெயின், ஜெனரல் குட்கோவ் முன்னணியில் இருந்த தனது படைகளை சந்தித்தபோதுதான் இந்த துயர சம்பவம் நிகழ்ந்ததாக தெரிவித்துள்ளார்.

ரஷ்ய கூட்டமைப்பின் நாயகன் என்ற உயரிய விருதை பெற்றவரான குட்கோவ், ரஷ்யாவின் 115-வது கடற்படைப் பிரிவின் தளபதியாக பணியாற்றி வந்தார். கடந்த மார்ச் மாதத்தில்தான் அவர் ரஷ்ய கடற்படையின் துணை தலைவராகப் பதவி உயர்வு பெற்றார் என்பது குறிப்பிடத்தக்கது. அவரது இந்த திடீர் மறைவு, ரஷ்ய படைகளுக்குப் பெரும் பின்னடைவாக கருதப்படுகிறது.

2022 ஆம் ஆண்டு உக்ரைன் மீது ரஷ்யா படையெடுத்தது முதல், ரஷ்ய ராணுவம் பல உயர்மட்ட தளபதிகளை இழந்திருக்கிறது. மேஜர் ஜெனரல் மிகைல் குட்கோவின் மறைவையும் சேர்த்து, இதுவரை ரஷ்யாவின் 10 ராணுவ தளபதிகள் இந்த போரில் கொல்லப்பட்டுள்ளனர். இரு தரப்பிலும் தொடர்ந்து அதிகரிக்கும் உயிரிழப்புகள், குறிப்பாக மூத்த ராணுவ அதிகாரிகளின் இழப்புகள், உலக அரங்கில் பெரும் கவலையை ஏற்படுத்தியுள்ளன. இந்த போர் எப்போது முடிவுக்கு வரும் என்ற கேள்வி உலகெங்கிலும் எதிரொலிக்கிறது.

Edited by Siva