அமெரிக்க ராணுவம் இன்று அதிகாலையில் ஈரானின் மூன்று முக்கிய அணுசக்தி வசதிகள் மீது வான்வழி தாக்குதல்களை நடத்தியதை தொடர்ந்து, ஈரான் இஸ்ரேல் மீது தனது முதல் கட்ட பாலிஸ்டிக் ஏவுகணைகளை ஏவியுள்ளது. இது மேற்கு ஆசிய மோதலில் ஒரு பெரிய உச்சக்கட்டத்தைக் குறிக்கிறது.
ஈரானில் இருந்து 30-க்கும் மேற்பட்ட பாலிஸ்டிக் ஏவுகணைகள் ஏவப்பட்டதாகவும் இதனால் இஸ்ரேலுக்கு பெரும் சேதம் என்றும் கூறப்படுகிறது.
பென் குரியன் விமான நிலையம் உட்பட இஸ்ரேலில் பல இடங்களை குறிவைத்து, நீண்ட தூர திரவ மற்றும் திட எரிபொருள் ஏவுகணைகளை, பேரழிவு தரும் போர்முனை சக்தியுடன் பயன்படுத்தியதாக ஈரான் தெரிவித்துள்ளது.
ஈரானின் இந்த பாலிஸ்டிக் ஏவுகணை தாக்குதலில் இஸ்ரேலில் குறைந்தது 16 பேர் காயமடைந்தனர். இது "பெரிய அளவிலான அழிவை" ஏற்படுத்தியதாக இஸ்ரேலின் அவசரகால சேவை, மாகேன் டேவிட் அடோம் தெரிவித்துள்ளது.
ஈரானில் இருந்து ஏவப்பட்ட ஒரு பாலிஸ்டிக் ஏவுகணை ஹைஃபா நகரை தாக்கியது. அங்கு சைரன்கள் ஒலிக்காத போதிலும் தாக்குதல் நிகழ்ந்ததாக தி டைம்ஸ் ஆப் இஸ்ரேல் தெரிவித்துள்ளது. இஸ்ரேல் முழுவதும் பலத்த சத்தங்கள் கேட்கப்பட்டன. பல பகுதிகளில் ஏற்பட்ட விபத்துகள் குறித்து தகவல்கள் வந்த நிலையில், மருத்துவ குழுவினர் சம்பவ இடங்களுக்கு விரைந்தனர்.
ஈரானின் இந்த தாக்குதல்களுக்கு பிறகு இஸ்ரேல் தனது வான்வெளியை மூடிவிட்டு, அடுத்த அறிவிப்பு வரும் வரை அத்தியாவசிய நடவடிக்கைகளை மட்டுமே அனுமதிப்பதாக ராணுவம் அறிவித்தது.
