லிப்டில் கயிற்றில் சிக்கிய சிறுவன்: காப்பாற்றிய சிறுமி- வைரல் வீடியோ

துருக்கியில் லிப்டில் கயிற்றில் சிக்கிய சிறுவனை சமயோஜிதமாக செயல்பட்டு சிறுமி காப்பாற்றும் வீடியோ இணையத்தில் வைரலாக பரவி வருகிறது.

துருக்கியில் உள்ள இஸ்தான்புலில் இரண்டு சிறுமியர்களும் ஒரு சிறுவனும் லிப்ட் ஒன்றினுள் நுழைகின்றனர். அந்த சிறுவன் ஒரு கயிற்றை இழுத்து வருகிறான். ஆனால் அதை யாரும் கவனிக்கவில்லை. லிஃப்டின் கதவுகள் மூடும்போது கயிறு கதவில் சிக்கிக் கொள்கிறது. லிஃப்ட் கீழே இறங்க தொடங்கவும் கயிறு சிறுவன் கழுத்தில் மாட்டி அவனை மேலே சடாரென தூக்கியது. உடனே சமயோஜிதமாக செயல்பட்ட சிறுமி அந்த சிறுவனை தூக்கி பிடித்து கழுத்து இறுகாதவாறு பார்த்துக் கொண்டார்.

அப்படியே லிஃப்டில் உள்ள அலாரம் பட்டனை அழுத்தி உடனே லிப்டை நிறுத்தினார். பிறகு கழுத்தை இறுக்கிய கயிறை விடுவித்து சிறுவனை மீட்டார். இந்த சம்பவம் அங்கிருந்த சிசிடிவி காட்சியில் பதிவாகி இருந்தது. இதை சமூக வலைதளத்தில் பகிர்ந்துள்ள பலர் சிறுமியின் புத்திசாலித்தனத்தை வெகுவாக பாராட்டியுள்ளனர்.