கூகுள் தனது Veo 3 செயற்கை நுண்ணறிவு வீடியோ உருவாக்கும் மாடலை 71 நாடுகளுக்கு அறிமுகம் செய்துள்ளதாக அறிவித்துள்ளது. Gemini செயலி மற்றும் அதன் வலைத்தளத்தில் இந்த புதிய AI மாடல் கொண்டு வரப்பட்டுள்ளதாக கூகுள் தெரிவித்துள்ளது. ஆனால் அதே நேரத்தில் Veo 3 மாடல் Geminiயின் பிரிமியம் சந்தாதாரர்களுக்கு மட்டுமே கிடைக்கிறது.
கடந்த வாரம் நடைபெற்ற Google I/O 2025 நிகழ்வில் Veo 3 அறிமுகப்படுத்தப்பட்டது. இதில் புதிய மேம்பாடுகள் மற்றும் உள்ளமைக்கப்பட்ட ஆடியோ உருவாக்கும் திறன் உள்ளிட்ட பல வசதிகள் உள்ளன.
Google Labs மற்றும் Gemini துணைத் தலைவர் ஜோஷ் வுட்வர்ட் X தளத்தில் வெளியிட்ட பதிவில், Veo 3 மாடல் தற்போது 71 புதிய நாடுகளில் கிடைக்கும். ஆனால் இந்த 71 நாடுகள் பட்டியலில் ஐரோப்பிய ஒன்றிய நாடுகள், இங்கிலாந்து மற்றும் இந்தியா இடம்பெறவில்லை என்பது குறிப்பிடத்தக்கது.
இந்தியாவில் Veo 3 எப்போது கிடைக்கும் என்று ஒருவர் கேள்வி எழுப்ப, வுட்வர்ட், “இந்தியாவிலும் விரைவில் கொண்டு வர முயற்சி செய்து கொண்டு இருக்கிறோம்!” என்று பதிலளித்தார்.
Veo 3-க்கு அனுமதி பெறும் நாடுகளில் அர்ஜெண்டினா, ஆஸ்திரேலியா, பிரேசில், கனடா, ஜப்பான், கென்யா, மலேசியா, நேபாளம், நியூஸிலாந்து, பாகிஸ்தான், சிங்கப்பூர், தென் ஆப்பிரிக்கா, தென் கொரியா, இலங்கை, அமெரிக்கா மற்றும் ஜிம்பாப்வே ஆகியவை அடங்கும்.
