சரவண பவன் உரிமையாளர் கதையின் உல்டா மாதிரி இருக்கே… எதிர்பார்ப்பைக் கூட்டும் ‘ராஜாகிளி’ டிரைலர்!

தமிழ் சினிமாவில் இயக்குனராகவும், நகைச்சுவை நடிகராகவும் அறியப்படுபவர் தம்பி ராமையா. இவர் இயக்கத்தில் வடிவேலு நடிப்பில் உருவான இந்திரலோகத்தில் நா அழகப்பன் திரைப்படம் கவனத்தைப் பெற்றது. அதன் பின்னர் மைனா படம் மூலமாக முன்னணி நடிகராகிவிட்ட இவர் தொடர்ந்து நடித்து வருகிறார்.

இந்நிலையில் இப்போது அவர் கதை, திரைக்கதை, வசனம், இசை மற்றும் பாடல்கள் எழுதி ராஜாக்கிளி என்ற படத்தில் நடித்துள்ளார். இந்த படத்தை மாநாடு படத்தின் தயாரிப்பாளர் சுரேஷ் காமாட்சி தயாரிக்கிறார். மேலும் இந்த படத்தில் சமுத்திரக்கனி கதாநாயகனாக நடித்துள்ளார். முதலில் தம்பி ராமையா தான் இந்த படத்தை இயக்குவதாக இருந்தார். இந்நிலையில் இப்போது அவரின் மகன் உமாபதி ராமையா இயக்கியுள்ளார்.

இந்த படத்தின் டிரைலர் சமீபத்தில் வெளியாகி கவனம் பெற்றுள்ளது. டிரைலரில் மிகப்பெரிய தொழிலதிபராக இருக்கும் தம்பி ராமையா ஜோதிடத்தை நம்பி மூன்று கல்யாணம் செய்துகொள்ள ஆசைப்படுகிறார். அந்த மூன்றாவது கல்யாணம் செய்ய விரும்பும் பெண்ணுக்கு ஏற்கனவே கல்யாணம் ஆகி இருக்க அதனால் ஏற்படும் பிரச்சனைகளும், இதில் தம்பி ராமையா கதாபாத்திரம் மனம் மாறுவதும்தான் கதை என்பது தெரிகிறது. இது அப்படியே தமிழகத்தின் மிகப்பிரபலமான சரவணன் பவன் ராஜகோபால்- ஜீவஜோதி பிரச்சனையை பிரதிபலிப்பது போல உள்ளது.