கடந்த ஆண்டு வெளியாகி நல்ல விமர்சனங்களையும் வசூலையும் குவித்தது பீல்குட் படமான குட்னைட். பெரிய ஆர்ப்பாட்டம் இல்லாமல் ரிலீஸான இந்த படம் பலரது பாராட்டுகளையும் குவித்தது. இதையடுத்து அதே தயாரிப்பு நிறுவனமான மில்லியன் டாலர்ஸ் ஸ்டுடியோ நிறுவனம் மீண்டும் மணிகண்டன் நடிப்பில் லவ்வர் திரைப்படத்தைத் தயாரித்தது.
இந்த படத்தில் மணிகண்டன், கண்ணா ரவி மற்றும் ஸ்ரீகௌரி பிரியா ஆகியோர் முக்கிய வேடத்தில் நடித்திருந்தனர். படத்தில் டாக்ஸிக் காதலராக மணிகண்டன் நடித்திருந்தார். தன்னுடைய கேரியர், காதல் வாழ்க்கை தொடர்பான தடுமாற்றங்களில் அவர் எவ்வளவு மோசமானவராக நடந்து கொள்கிறார், அதில் இருந்து எப்படி வெளிவருகிறார் என்பதை சொல்லி இருந்தது லவ்வர் திரைப்படம். இந்த படம் இளைஞர்களை கவர்ந்தாலும் பெரிய அளவில் வசூல் செய்யவில்லை.
இந்நிலையில் கவனிக்கத்தக்க தயாரிப்பு நிறுவனமாக அறியப்பட்டுள்ள மில்லியன் டாலர்ஸ் ஸ்டுடியோ அடுத்தடுத்து ஐந்து படங்களை தயாரிக்க உள்ளதாக சொல்லப்படுகிறது. அந்த வரிசையில் ஆர் ஜே பாலாஜி நடிக்கும் ஒரு படமும் அடக்கம். இந்நிலையில் அதை அறிவித்துள்ள அந்நிறுவனம் படத்தின் இயக்குனர் யார் என்பதை இன்னும் அறிவிக்கவில்லை.
