விஜய் சேதுபதியின் 50 ஆவது படமான மகாராஜா கடந்த ஆண்டு ஜூன் 12 ஆம் தேதி ரிலீஸாகி பிளாக்பஸ்டர் ஹிட்டானது. இந்த படத்தில் அனுராக் காஷ்யப், மம்தா மோகன்தாஸ், நட்ராஜ் நட்டி மற்றும் பாய்ஸ் மணிகண்டன் மற்றும் சிங்கம்புலிஆகியோர் முக்கிய வேடத்தில் நடித்துள்ளனர். கடந்த காலங்களில் விஜய் சேதுபதியின் எந்த படமும் தொடாத வசூல் சாதனையை மகாராஜா செய்துள்ளது.
இந்த படம் திரையரங்குகள் மூலமாக மட்டுமே 100 கோடி ரூபாய்க்கு மேல் வசூலித்துள்ளது. இந்நிலையில் இந்த படம் சில தினங்களுக்கு முன்னர் நெட்பிளிக்ஸ் ஓடிடியில் வெளியாகி பல நாடுகளில் நம்பர் 1 இடத்தில் ட்ரண்டிங்கில் இருந்தது. அதன் பின்னர் நெட்பிளிக்ஸ் தளத்தில் அதிகமாகப் பார்க்கப்பட்ட இந்தியப் படங்களின் வரிசையில் முதலிடத்துக்கு சென்றது. நெட்பிளிக்ஸில் இந்த படம் 150 கோடி ரூபாய்க்கு மேல் லாபத்தை ஈட்டியுள்ளதாக சொல்லப்படுகிறது.
இந்நிலையில் இந்த படம் பற்றி பேசியுள்ள இயக்குனர் நித்திலன் “நான் சமீபத்தில் அனுராக் காஷ்யப் சாரைப் பார்க்க சென்றிருந்தேன். அவர் அப்போது “இயக்குனர் இனாரித்து என்னை தன்னுடைய அடுத்த படத்தில் நடிக்க வைக்கிறேன் என சொல்லியுள்ளார். அவர் மகாராஜா படம் பார்த்து அதில் என் நடிப்பு பிடித்திருந்ததால்தான் என கூறினார்’ என தெரிவித்தார். எனக்கு அது மிகவும் பெருமையான ஒன்றாக இருக்கிறது” எனக் கூறியுள்ளார்.
