நெல்சன் இயக்கத்தில் சூப்பர் ஸ்டார் ரஜினிகாந்த், மோகன் லால், சிவராஜ் குமார், ஜாக்கி ஷ்ராஃப், ரம்யா கிருஷ்ணன், வசந்த் ரவி உள்ளிட்டோர் நடித்திருக்கும் ஜெயிலர் திரைப்படம் எதிர்பார்ப்புகளுக்கு மத்தியில் ஆகஸ்ட் 10 ஆம் தேதி ரிலீஸ் ஆக உள்ளது. இந்த படத்தின் ஆடியோ வெளியீடு நேற்று சென்னை நேரு உள்விளையாட்டு அரங்கத்தில் நடைபெற்றது.
அப்போது பேசிய படத்தின் இசையமைப்பாளர் அனிருத் “நெல்சன் குறி இந்த முறை தப்பாது. தலைவருக்காக பாட்டு மட்டுமில்ல உயிரையே கொடுப்பேன்” என உணர்ச்சி பொங்க பேசினார். நெல்சன் இயக்கத்தில் கடைசியாக வெளியான பீஸ்ட் திரைப்படம் மோசமான விமர்சனங்களைப் பெற்ற நிலையில் ரஜினி படத்தில் இருந்து நெல்சனை நீக்க விநியோகஸ்தர்கள் வலியுறுத்தியதாக ரஜினிகாந்த் அதே மேடையில் கூறியிருந்தது குறிப்பிடத்தக்கது.
கோலமாவு கோகிலா மற்றும் டாக்டர் என அடுத்தடுத்து வெற்றிப் படங்களைக் கொடுத்த நெல்சன் மூன்றாவது படத்திலேயே விஜய்யை இயக்கும் வாய்ப்பை பெற்றார். மிகப்பெரிய எதிர்பார்ப்புகளுக்கு மத்தியில் ரிலீஸான அந்த படம் மோசமான விமர்சங்களைப் பெற்றது. வசூலும் பெரியளவில் இல்லை. இந்த படத்தின் தோல்வியால் நெல்சன் சமூகவலைதளங்களில் கொடூரமாக ட்ரோல் செய்யப்பட்டார் என்பது குறிப்பிடத்தக்கது.
