தமிழக வெற்றி கழகத்தின் முதலாம் ஆண்டு விழா மாமல்லபுரம் அருகே 26ஆம் தேதி நடைபெற உள்ளது. இந்த விழாவில் கலந்து கொள்ள 2000 பேருக்கு மட்டுமே அனுமதி வழங்கப்படும் என்றும், இன்று முதல் பாஸ் வழங்கும் பணியை தொடங்கி உள்ளதாகவும் தகவல் வெளியாகியுள்ளன.
நடிகர் விஜய் கடந்த ஆண்டு பிப்ரவரி மாதம் தமிழக வெற்றி கழகம் என்ற அரசியல் கட்சியை தொடங்கிய நிலையில், அந்த கட்சி தொடங்கி ஒரு ஆண்டு நிறைவு பெற்றதை அடுத்து பிரமாண்டமான விழா கொண்டாடப்பட உள்ளது.
சென்னை இசிஆர் சாலையில், மாமல்லபுரம் அருகே உள்ள பூஞ்சேரி கிராமத்தில் வரும் 26ஆம் தேதி காலை 9 மணிக்கு முதலாம் ஆண்டு விழா நடைபெற உள்ளது. இந்த விழாவில் அதிக கூட்டம் சேரக்கூடாது என்பதற்காக, முக்கிய நிர்வாகிகளுக்கு மட்டுமே பாஸ் வழங்கப்பட இருப்பதாகவும், மொத்தம் 2000 பேருக்கு மட்டுமே பாஸ் ஏற்பாடு செய்யப்பட்டு இருப்பதாகவும் தகவல் வெளியானது.
இன்று முதல் பாஸ் வழங்கும் பணி தொடங்கியுள்ளதால், பாஸ் உள்ளவர்கள் மட்டுமே ஆண்டு விழாவில் கலந்து கொள்ள அனுமதி என தெரிவிக்கப்பட்டுள்ளது. மேலும், இந்த விழாவில் 2000 பேருக்கு மட்டுமே அனுமதி என்பது உறுதி ஆகியுள்ள நிலையில், சில முக்கிய அறிவிப்புகள் வெளியாகும் என்று எதிர்பார்க்கப்படுகிறது.
