திமுக தலைவர் ஸ்டாலின் பாராட்டியதை தொடர்ந்து நாம் தமிழர் கட்சி ஒருங்கிணைப்பாளர் சீமான் அசுரன் படத்தை பாராட்டியுள்ளார்.
சமீபத்தில் வெற்றிமாறன் இயக்கத்தில் தனுஷ், மஞ்சு வாரியர் நடிப்பில் வெளியான அசுரன் திரைப்படம் தனுஷ ரசிகர்கள் மட்டுமல்லாமல் அனைவரின் பாராட்டையும் பெற்றது. எழுத்தாளர் பூமணியின் வெக்கை எனும் நாவல்தான் அசுரனாக திரைக்கு வந்தது.
ரசிகர்களின் வசூல் மழையிலும், சினிமா கலைஞர்களின் பாராட்டு மழையின் நனைந்த அசுரன் படத்தை திமுக தலைவர் ஸ்டாலின் பார்த்தார். அதன் பின்னர், அசுரன் - படம் மட்டுமல்ல பாடம்! பஞ்சமி நில உரிமை மீட்பை மையமாக வைத்து சாதிய சமூகத்தைச் சாடும் - சாதி வன்மத்தை கேள்வி கேட்கும் துணிச்சல்காரன்! என படக்குழுவினரை பாராட்டி டிவிட்டரில் பதிவிட்டார்.
இதனை தொடர்ந்து தற்போது நாம் தமிழர் கட்சி ஒருங்கிணைப்பாளர் சீமான் அசுரன் படத்தை பார்த்து பாராட்டியுள்ளார். சுமார் நான்கு பக்கத்திற்கு படத்தை பற்றிய தனது கருத்தையும், வெற்றிமாறன், தனுச்ஷ், தயாரிப்பாளர் தானு மற்றும் சக கலைஞர்களை பாராட்டியும் எழுதி வெளியிட்டுள்ளார் சீமான். குறிப்பாக தமிழ் சமூகம் எக்காலத்திற்கும் கொண்டாட வேண்டிய திரைக்காவியம் அசுரன் என குறிப்பிட்டுள்ளார்.