ஆட்சிக்கு வந்த உடன் மதுவிலக்கை அமல்படுத்துவோம் என கூறியுள்ள திமுக தான் 61% டாஸ்மாக்கை வைத்துள்ளது என பாமக முதல்வர் வேட்பாளர் அன்புமணி ராமதாஸ் கூறியுள்ளார்.
பாமக தேர்தல் அறிக்கையை தான் திமுக காப்பியடித்து தங்கள் தேர்தல் அறிக்கையாக வெளியிட்டது என ஏற்கனவே குற்றம் சாட்டியிருந்தது பாமக. மதுவிலைக்கை அமல் படுத்துவோம், ஆட்சிக்கு வந்ததும் முதல் கையெழுத்து மதுவிலக்கு தான் என நாங்கள் கூறி வந்ததை தான் தற்போது எல்லா கட்சிகளும் கூறி வருகின்றன, இது எங்களுக்கு கிடைத்த வெற்றி என அன்புமணி ராமதாஸ் பல மேடைகளில் கூறி வருகிறார்.
இந்நிலையில் நாங்கள் ஆட்சிக்கு வந்தால் முதல் கையெழுத்து மதுவிலக்குக்கு தான் என ஸ்டாலின் தேர்தல் பிரச்சாரத்தில் கூறி நாடகம் ஆடி வருகிறார் என அன்புமணி ராமதாஸ் கூறியுள்ளார். மேலும் மதுவிலக்கு என்பது ஒரு செயல்படுத்தும் முறை, ஆனால் மதுவிலக்கை அமல் படுத்துவதற்கு சட்டம் கொண்டுவருவோம் என திமுக தனது தேர்தல் அறிக்கையில் உள்ளது.
இது மக்களை ஏமாற்றும் வேலை, பொய்யான அறிக்கையாகும் என பாமக முதல்வர் வேட்பாளர் அன்புமணி தெரிவித்துள்ளார்.
