திரைப்பட துறையை தேவையின்றி விமர்சிக்க வேண்டாம்! – பாஜகவினருக்கு அண்ணாமலை அறிவுறுத்தல்!

மாநாடு படத்தை தடை செய்ய வேண்டும் என பாஜக நிர்வாகி கூறியதாக செய்திகள் வெளியான நிலையில் திரைப்படங்களை தேவையின்றி விமர்சிக்க வேண்டாம் என பாஜக அண்ணாமலை தெரிவித்துள்ளார்.

வெங்கட் பிரபு இயக்கத்தில் சிம்பு நடித்து வெளியாகியுள்ள படம் மாநாடு. டைம் லூப் கான்செப்டை மையப்படுத்தி உருவாகியுள்ள இந்த படம் திரையரங்குகளில் வெளியாகி நல்ல வரவேற்பை பெற்றுள்ளது. இந்நிலையில் இஸ்லாமிய மார்க்கம் தற்கொலையை எதிர்க்கும் நிலையில் இஸ்லாமிய இளைஞர் தற்கொலை செய்து கொள்வது போல காட்சிகள் வைத்திருப்பதால் படத்தை தடை செய்ய வேண்டும் என பாஜகவை சேர்ந்த இஸ்லாமிய நிர்வாகி ஒருவர் கூறியதாக செய்திகள் வெளியானது.

இந்நிலையில் இதுகுறித்து பாஜகவினருக்கு அறிவுறுத்தியுள்ள பாஜக தமிழக தலைவர் அண்ணாமலை “வரலாற்றுரீதியான படங்கள் தவறாக எடுக்கப்பட்டால் சுட்டிக்காட்டுவதில் தவறில்லை. ஆனால் சாதாரணமாக வெளியாகும் பொழுதுபோக்கு படங்களை விமர்சிப்பதும், தடை செய்ய கோருவதும் தேவையற்றது” என்று தெரிவித்துள்ளார்.