செந்தில் பாலாஜி உள்பட 3 அமைச்சர்களுக்கு எதிராக நம்பிக்கையில்லா தீர்மானம்: சட்டசபையில் அமளி..!

தமிழக அரசில் இடம்பெற்றிருக்கும் 3 அமைச்சர்களின் செயல்பாடுகளை எதிர்த்து, அதிமுக உறுப்பினர்கள் சட்டமன்றத்தில் ஆர்ப்பாட்டத்தில் ஈடுபட்டனர். குறிப்பாக, அமைச்சர் செந்தில் பாலாஜி, கே.என். நேரு மற்றும் பொன்முடிக்கு எதிராக நம்பிக்கையில்லா தீர்மானம் கொண்டு வர அனுமதி மறுக்கப்பட்டதையே காரணமாகக் கொண்டு அவர்கள் கடும் எதிர்ப்பை வெளியிட்டனர்.

இதனைத் தொடர்ந்து, எதிர்க்கட்சித் தலைவர் எடப்பாடி பழனிசாமியின் தலைமையில் அதிமுக எம்எல்ஏக்கள் அனைவரும் சட்டமன்றத்திலிருந்து வெளிநடப்பை மேற்கொண்டனர்.

அமலாக்கத்துறை விசாரணையில் சிக்கியுள்ள கே.என். நேரு, டாஸ்மாக் உரிமைகள் விவகாரத்தில் தொடர்புடைய செந்தில் பாலாஜி, மற்றும் பெண்கள் தொடர்பான பேச்சுகள் காரணமாக குற்றச்சாட்டுகளுக்கு உள்ளாகியுள்ள பொன்முடி ஆகியோருக்கு எதிராக நம்பிக்கையற்ற தீர்மானம் முன்வைக்கப்பட்டது. ஆனால், சபாநாயகர் அப்பாவு அவர்களால் அந்தத் தீர்மானம் தள்ளுபடி செய்யப்பட்டதால், அதிமுக உறுப்பினர்கள்  தங்களது கடும் எதிர்ப்பை பதிவுசெய்து, அமளியில் ஈடுபட்டு புறக்கணிப்பு செய்தனர்.

அதே நேரத்தில், சட்டமன்ற வளாகத்தில் தமிழக அரசை விமர்சிக்கும் வகையில் முழக்கங்களை எழுப்பியும் அதிமுக உறுப்பினர்கள் தங்கள் எதிர்ப்பைத் தெரிவித்தனர் என்பதும் குறிப்பிடத்தக்கது.

Edited by Mahendran