தேவர் ஜெயந்தி மற்றும் குருபூஜைக்காக பசும்பொன் சென்ற அதிமுக முன்னாள் அமைச்சர்களின் கார்கள் ஒன்றோடு ஒன்று மோதி விபத்திற்குள்ளான சம்பவம் பரபரப்பை ஏற்படுத்தியுள்ளது.
பசும்பொன் முத்துராமலிங்க தேவரின் ஜெயந்தி மற்றும் குருபூஜை இன்று பசும்பொன்னில் உள்ள அவரது நினைவிடத்தில் நடைபெறுகிறது. இதற்காக தமிழகம் முழுவதும் பல பகுதிகளில் இருந்து பலரும் பசும்பொன் சென்றுள்ளனர்.
அதிமுக பிரபலங்களும் தேவரின் நினைவிடத்தில் மரியாதை செலுத்த பசும்பொன் சென்றனர். அதிமுக முன்னாள் அமைச்சர்கள் காமராஜ், விஜயபாஸ்கர், பாஸ்கரன் ஆகியோரது கார்களும், அவர்களது ஆதரவாளர்கள் கார்களும் மானாமதுரை அருகே சென்றுக் கொண்டிருந்தபோது ஒன்றுடன் ஒன்று மோதி விபத்திற்குள்ளானதாக செய்திகள் வெளியாகியுள்ளது.
இந்த விபத்தில் சுமார் 10 கார்கள் சேதமடைந்துள்ளதாக தகவல்கள் வெளியாகியுள்ளது. முன்னாள் அமைச்சர்களுக்கு காயங்கள் ஏற்பட்டனவா என்பது குறித்த தகவல்கள் வெளியாகவில்லை. இந்த சம்பவம் அதிமுகவினர் இடையே அதிர்ச்சியை ஏற்படுத்தியுள்ளது.
