தொடங்கிய வேகத்தில் ஒத்திவைக்கப்பட்ட மாநிலங்களவை! இனி புதன்கிழமைதான்!

நாடாளுமன்ற குளிர்கால கூட்டத்தொடர் இன்று தொடங்கிய நிலையில் மாநிலங்களவை புதன்கிழமைக்கு ஒத்தி வைக்கப்பட்டுள்ளது.

நாடாளுமன்றத்தில் குளிர்கால கூட்டத்தொடர் இன்று தொடங்கப்பட்ட நிலையில், இந்த கூட்டத்தொடரில் வக்பு வாரிய சட்ட திருத்த மசோதா உள்ளிட்ட பல தீர்மானங்களை நிறைவேற்ற மத்திய அரசு திட்டமிட்டுள்ளது. அதேசமயம் எதிர்கட்சியினர் அதானி மீதான ஊழல் குற்றச்சாட்டு, மணிப்பூர் கலவரம் குறித்து விவாதிக்கப்பட வேண்டும் என்பதில் குறியாக உள்ளனர்.

இந்நிலையில் இன்று காலை மக்களவை, மாநிலங்களவை என இரண்டு அவைகளுமே தொடங்கிய நிலையில் எதிர்கட்சிகள் அமளியில் ஈடுபடத் தொடங்கின. இதனால் மக்களவை மதியம் 12 மணிக்கு ஒத்தி வைக்கப்பட்டது.

ஆனால் மாநிலங்களவை இன்று முழுவதுமே ஒத்திவைக்கப்பட்டுள்ளது. நாளை அரசியல் சாசன தினம் கொண்டாடப்படுவதால் நாளை மாநிலங்களவை அமர்வு இல்லை. இதனால் மீண்டும் புதன்கிழமை காலையில்தான் மாநிலங்களவை அமர்வு தொடங்கும் என அறிவிக்கப்பட்டுள்ளது.

Edit by Prasanth.K