திருமணம்.. பிளாக் பெல்ட்.. நீச்சல் பயிற்சி - ராகுல் கலகல பேட்டி

காங்கிரஸ் துணைத் தலைவர் ராகுல்காந்தி தற்காப்பு கலையில் பிளாக் பெல்ட் பெற்றவர் என்பது தெரியவந்துள்ளது.

டெல்லியில் முனைவர் பட்டம் பெற்ற அறிஞர்களுக்கான மாநாடு நேற்று நடைபெற்றது. அதில் ராகுல்காந்தி சிறப்பு விருந்தினராக கலந்து கொண்டார். அப்போது அவரிடம் சில சுவாரஸ்யான கேள்விகள் எழுப்பப்பட்டன. அவரும் அதற்கெல்லாம் பதிலளித்தார். 

குறிப்பாக பிரபல குத்து சண்டை வீரர் விஜேந்திரசிங் அவரின் இரண்டு கேள்விகளை எழுப்பினார். முதல் கேள்வியாக, ‘உங்கள் திருமணம் எப்போது? அதற்காக ஏராளமானோர் காத்திருக்கிறார்கள் தெரியுமா?’ என கேட்டார். 

அதற்கு பதிலளித்த ராகுல்  ‘இது மிகவும் பழைய கேள்வி. ஆனாலும், பதில் சொல்கிறேன். என் திருமணம் கண்டிப்பாக நடக்கும். ஆனால் எப்போது எனத் தெரியாது. அதுவரை அனைவரும் பொறுத்திருங்கள்’ என சிரித்துக்கொண்டே பதிலளித்தார்.

அடுத்து நீங்கள் விளையாடுவீர்களா எனக் கேட்டார், அதற்கு  ‘நான் தினமும் நீச்சல் பயிற்சி செய்வேன். மேலும், ஜப்பானின் மார்ஷியல் ஆர்ட்ஸ் கலையில் பிளாக் பெல்ட் வாங்கியிருக்கிறேன். அதை தொடர்ந்து செய்து வருகிறேன்’ எனக் கூறினார். 

அதுபற்றிய வீடியோவை வெளியிடுமாறு விஜேந்தர் கோரிக்கை வைக்க ‘கண்டிப்பாக, விரைவில் வெளியிடுகிறேன்’ என ராகுல் காந்தி பதிலளித்தார்.