தமிழகத்தில் பெண்களுக்கு இலவச பேருந்து பயணம் என்ற நிலை ஏற்கனவே அமல்படுத்தப்பட்டுள்ள நிலையில் தற்போது குஜராத்தில் வயதான பெண்களுக்கு இலவச பேருந்து பயணம் என்ற வாக்குறுதியை அம்மாநில பாஜக அளித்துள்ளது.
டிசம்பர் 1 மற்றும் 5 ஆகிய 2 தேதிகளில் குஜராத் மாநில சட்டமன்ற தேர்தல் நடைபெற இருக்கும் நிலையில் அம்மாநிலத்தில் அனைத்து கட்சிகளும் தீவிரமாக பிரசாரம் செய்து வருகின்றன.
இந்த நிலையில் பாஜக தனது தேர்தல் அறிக்கையை தற்போது வெளியிட்டுள்ளது. அதில் வயதான பெண்களுக்கு இலவசமாக பேருந்தில் பயணம் செய்ய அனுமதிக்கப்படும் என்பது உள்பட 40 முக்கிய வாக்குறுதிகள் கொடுக்கப்பட்டு உள்ளன
மேலும் கல்லூரி மாணவிகளுக்கு இலவச ஸ்கூட்டி மற்றும் ஒன்பதாம் வகுப்பு முதல் 12-ஆம் வகுப்பு வரை படிக்கும் அனைத்து மாணவிகளுக்கும் இலவச சைக்கிள் உள்பட பல கவர்ச்சியான வாக்குறுதிகள் அளிக்கப்பட்டுள்ளன.
ஏற்கனவே குஜராத்தில் பாஜக ஆட்சியில் இருக்கும் நிலையில் மீண்டுமொரு முறை ஆட்சியை பிடிக்குமா என்பதை பொறுத்திருந்து பார்ப்போம்.
