தனியார் தொலைத்தொடர்பு நிறுவனங்களுடன் போட்டியிடும் வகையில், அரசுக்கு சொந்தமான பிஎஸ்என்எல் நிறுவனம், புதிய முயற்சியாக சிம் கார்டுகளை வீட்டிற்கே கொண்டு வந்து வழங்கும் சேவையை தொடங்கியுள்ளது.
புதிய மொபைல் இணைப்பு பெறுவதை எளிதாக்கும் நோக்கில், ப்ரீபெய்ட் அல்லது போஸ்ட்பெய்ட் சிம் கார்டுகளை வாடிக்கையாளர்கள் வீட்டிலிருந்தபடியே ஆர்டர் செய்யலாம். இந்த சேவை மூலம் ஜியோ, ஏர்டெல், வோடபோன் ஐடியா போன்ற போட்டி நிறுவனங்களுக்கு இணையாக பிஎஸ்என்எல் சேவைகளை வழங்குகிறது. எனினும், தனியார் நிறுவனங்களை போல பிஎஸ்என்எல் சிம் டெலிவரி சேவை முற்றிலும் இலவசமா என்பது குறித்து தெளிவான தகவல் இல்லை.
பிஎஸ்என்எல் சிம் கார்டை வீட்டிலிருந்து பெறுவது எப்படி?
பிஎஸ்என்எல் சிம் கார்டை வீட்டிலிருந்தே பெறுவது மிகவும் எளிது. பயனர்கள் பிஎஸ்என்எல்-இன் பிரத்யேக சிம் டெலிவரி போர்ட்டலுக்கு செல்ல வேண்டும். அங்கு, புதிய எண் வாங்கவோ அல்லது ஏற்கனவே உள்ள எண்ணை வேறு நெட்வொர்க்கிலிருந்து பிஎஸ்என்எல்-க்கு மாற்றவோ முடியும். இது புதிய வாடிக்கையாளர்களை ஈர்ப்பதோடு, தற்போதைய சேவை வழங்குநரால் சோர்வடைந்தவர்களுக்கு ஒரு தொந்தரவு இல்லாத மாற்றத்தை வழங்கும் நோக்கில் தொடங்கப்பட்டுள்ளது.
போர்ட்டலில், பயனர்கள் பெயர், பின்கோடு, மாற்று மொபைல் எண் போன்ற சில அடிப்படை விவரங்களை பூர்த்தி செய்ய வேண்டும். அதன் பிறகு, பிஎஸ்என்எல் மாற்று மொபைல் எண்ணுக்கு சரிபார்ப்புக்காக ஒருமுறை பயன்படுத்தும் OTP அனுப்பும். விரைவான Self-KYC படிநிலையும் இந்ச் செயல்முறையின் ஒரு பகுதியாகும். இது முடிந்ததும், உங்களின் புதிய சிம் கார்டு உங்கள் வீட்டிற்கே வந்து சேரும்.
டிராய் தரவுகளின்படி, கடந்த ஏப்ரல் மாதத்தில் மட்டும் பிஎஸ்என்எல் சுமார் 1.8 மில்லியன் செயலில் உள்ள பயனர்களை இழந்தது. மேலும், அதன் செயலில் உள்ள பயனர் விகிதம் வெறும் 61.4% ஆக உள்ளது. இது அனைத்து முக்கிய தொலைத்தொடர்பு சேவை வழங்குநர்களிலும் மிகக் குறைவாகும்.
இந்த புதிய சிம் டெலிவரி சேவை மூலம், பிஎஸ்என்எல் வாடிக்கையாளர்களுக்கு, குறிப்பாக கிராமப்புற மற்றும் நகர்ப்புறங்களுக்கு வெளியே உள்ள பகுதிகளில், கடைகளுக்கு செல்ல வேண்டிய தேவையை நீக்குவதன் மூலம் வாழ்க்கையை எளிதாக்க நம்புகிறது. இந்த சேவையின் வெற்றி, டெலிவரி மற்றும் சரிபார்ப்பு செயல்முறைகள் எவ்வளவு சீராகவும் திறமையாகவும் கையாளப்படுகின்றன என்பதை பொறுத்தே அமையும்.
