பங்குச்சந்தை இன்று கடும் சரிவை சந்தித்தது. மும்பை பங்குச்சந்தை குறியீடு சென்செக்ஸ் இன்று காலை 77,384.98 புள்ளிகளில் தொடங்கியது. பிற்பகலில் இது 1,000-க்கும் அதிகமான புள்ளிகள் சரிந்து, வர்த்தக நேர முடிவில் 1,018.20 புள்ளிகள் குறைந்து 76,293.60 புள்ளிகளில் முடிவடைந்தது. ஒரு கட்டத்தில் சென்செக்ஸ் 1,200 புள்ளிகள் வரை சரிந்தது.
தேசிய பங்குச்சந்தை குறியீட்டு எண் நிஃப்டியும் 23,100 புள்ளிகளுக்குக் கீழ் சரிவடைந்தது. வர்த்தக நேர முடிவில், இது 309.80 புள்ளிகள் குறைந்து 23,071.80 புள்ளிகளில் முடிந்தது.
நிஃப்டியில், அப்போலோ மருத்துவமனை, ஈச்சர் மோட்டார்ஸ், ஸ்ரீராம் நிதி, கோல் இந்தியா, மற்றும் டாடா ஸ்டீல் ஆகிய நிறுவனங்கள் முக்கிய இழப்பை சந்தித்தன. அதே நேரத்தில், அதானி எண்டர்பிரைசஸ், டிரென்ட், பாரதி ஏர்டெல், மற்றும் கிராஸிம் இண்டஸ்ட்ரீஸ் ஆகிய நிறுவனங்களின் பங்குகள் லாபத்தில் முடிந்தன.
முழுமையாக பங்குச்சந்தை வீழ்ச்சியைக் கண்ட நிறுவனங்கள் என்றால் நுகர்வோர் பொருட்கள், மூலதனப் பொருட்கள், தகவல் தொழில்நுட்பம், எண்ணெய் & எரிவாயு, சுகாதாரம், மின்சாரம், பொதுத்துறை நிறுவனம், ரியல் எஸ்டேட், தொலைத்தொடர்பு நிறுவனங்கள் தான். இவை 1% - 3% வரை சரிவை சந்தித்தன.
அமெரிக்க அதிபர் டொனால்ட் ட்ரம்பின் புதிய பொருளாதாரக் கொள்கைகள் இந்திய பங்குச்சந்தை வீழ்ச்சிக்கு முக்கிய காரணமாக பார்க்கப்படுகிறது. அவர் எடுத்திருக்கும் முடிவுகள், வர்த்தகப் போர் உருவாகும் வாய்ப்பை உருவாக்கியுள்ளன.
மேலும், டாலருக்கு எதிராக இந்திய ரூபாயின் மதிப்பு தொடர்ந்து குறைந்து வருகிறது. டாலர் மதிப்பு உயர்வதால், வெளிநாட்டு முதலீட்டாளர்கள் இந்திய பங்குகளை தொடர்ந்து விற்று வருவதும் இந்த சரிவுக்கு காரணமாகும்
