300 ஆண்டுகள் பழமையான ஈரோடு கருங்கல்பாளையம் பெரிய மாரியம்மன் கோவில்: சிறப்புகள் மற்றும் வழிபாட்டு முறைகள்

ஈரோடு மாநகராட்சிக்குட்பட்ட கருங்கல்பாளையத்தில் அமைந்துள்ள பெரிய மாரியம்மன் கோவில், சுமார் 300 ஆண்டுகள் பழமையான ஒரு புகழ்பெற்ற வழிபாட்டு தலமாகும். ஒவ்வொரு கோவிலுக்கும் தனித்துவமான சிறப்புகள் இருப்பது போல, இந்த கோவிலுக்கும் சில முக்கிய அம்சங்கள் உள்ளன. 

இங்கு பெரிய மாரியம்மன் மூலவராக அருள்பாலிப்பதுடன், அரசமர விநாயகர், முருகன், துர்க்கை அம்மன், நவக்கிரகம் போன்ற தெய்வச் சிலைகளும் அமைந்துள்ளன. கோவிலின் உள்ளே பெரிய பாம்புப் புற்று ஒன்றும் உள்ளது.

இந்த கோவிலில் ஆண்டு முழுவதும் பல்வேறு திருவிழாக்கள் கொண்டாடப்பட்டாலும், ஆடி மாதத்தில் நடைபெறும் நிகழ்வுகள் மிகவும் சிறப்பு வாய்ந்தவை. ஆடி மாதம் முழுவதும் வரும் வெள்ளிக்கிழமைகளில் சிறப்பு பூஜைகளும், இரவு நேரத்தில் அன்னதானமும் வழங்கப்படுகின்றன. 

ஆடி மாதத்தின் மூன்றாவது வெள்ளிக்கிழமை அன்று, பெருமாள் கோவிலில் இருந்து பெரிய மாரியம்மன் கோவிலுக்குச் சீர்வரிசை கொண்டு வருவது இந்தக் கோவிலின் தனிச்சிறப்பாகும்.

மேலும், ஆடி 18 அன்று கன்னிமாருக்குச் சிறப்புப் பூஜைகள் காலை முதல் இரவு வரை நடைபெறும். இந்த நாட்களில் கோவிலுக்கு வரும் பக்தர்களுக்குக் கூழ் பிரசாதமாக வழங்கப்படுகிறது. ஆடி மாதம் முழுவதும் அதிக எண்ணிக்கையிலான பெண்கள் இங்கு வந்து அம்மனை வழிபட்டு, தங்கள் வேண்டுதல்கள் நிறைவேறப் பரிகாரங்கள் செய்கின்றனர்.

Edited by Mahendran