இந்தியா மற்றும் ஆஸ்திரேலியா அணிகளுக்கு இடையிலான நான்காவது கிரிக்கெட் டெஸ்ட் போட்டி ஒரு டி 20 போன்ற பரபரப்புடன் விறுவிறுப்பாக நடந்து முடிந்துள்ளது. இந்த போட்டியில் வென்றதன் மூலம் பார்டர் கவாஸ்கர் கோப்பை தொடரை ஆஸ்திரேலியா 10 ஆண்டுகளுக்குப் பிறகு கைப்பற்றும் வாய்ப்பைப் பெற்றுள்ளது.
இந்த தோல்விக்கு இந்திய அணியின் மூத்த பேட்ஸ்மேன்களின் சொதப்பலான ஆட்டம்தான் முக்கியக் காரணம் என்பது மறுக்க முடியாது. அதிலும் ரோஹித் மற்றும் கோலி ஆகியோர் தொடர்ந்து சொதப்பி வருகின்றனர். இந்நிலையில் போட்டி முடிந்ததும் பேசிய கேப்டன் ரோஹித் ஷர்மா தன்னுடைய பேட்டிங் திருப்திகரமாக இல்லை என்று கூறியுள்ளார். இந்நிலையில் கோலி மற்றும் ரோஹித் ஷர்மா ஆகிய இருவரும் ஓய்வு பெறவேண்டுமென ரசிகர்கள் கருத்துகளை தெரிவித்து வருகின்றனர்.
இந்நிலையில் பாகிஸ்தான் அணியின் முன்னாள் வீரர் பசித் அலி “கோலி இடத்தில் நிதீஷ் குமாரை இறக்க வேண்டும். கோலி ஐந்தாவது பேட்ஸ்மேனாக வர வேண்டும். கோலியால் ரன் சேர்க்க முடியவில்லை என்றால் கீழே இறங்கிதான் ஆடவேண்டும். அதைதான் ரோஹித் ஷர்மா செய்தார். ஆனால் இதைப் பற்றி யாரும் பேசுவதில்லை. அதற்குக் காரணம் எல்லோருக்கும் இருக்கும் பயம்தான் என தோன்றுகிறது” எனப் பேசியுள்ளார்.
