ஒரே நாளில் விழுந்த 23 விக்கெட்கள்… டெஸ்ட் கிரிக்கெட்டில் நடந்த சாதனை!

இந்தியா மற்றும் தென்னாப்பிரிக்கா அணிகளுக்கிடையிலான இரண்டாவது டெஸ்ட் கிரிக்கெட் போட்டி நேற்று தொடங்கிய நிலையில் இரு அணிகளும் விக்கெட்களை மளமளவென இழந்து தடுமாறி வருகின்றன. நேற்றைய முதல் நாள் ஆட்டத்தில் மட்டும் 23 விக்கெட்கள் இழந்துள்ளன. டெஸ்ட் கிரிக்கெட் வரலாற்றில் ஒரே நாளில் அதிக விக்கெட்கள் விழுந்ததில் இரண்டாவது இடத்தில் நேற்றைய இன்னிங்ஸ் அமைந்துள்ளது.

இந்த போட்டியில் முதலில் பேட்டிங் செய்த தென்னாப்பிரிக்கா அணி 55 ரன்களுக்கு அனைத்து விக்கெட்களையும் இழந்தது. இந்திய அணியின் சார்பில் சிராஜ் அதிகபட்சமாக 6 விக்கெட்களை வீழ்த்தினார். அதையடுத்து பேட் செய்த இந்திய அணி 153 ரன்கள் சேர்த்து அனைத்து விக்கெட்களையும் இழந்தது.

பின்னர் மீண்டும் தங்கள் இரண்டாவது இன்னிங்ஸை தொடர்ந்து ஆடிய தென்னாப்பிரிக்கா முதல் நாள் முடிவில் 62 ரன்கள் சேர்த்து 3 விக்கெட்களை இழந்துள்ளது.