ஸ்பைடர்மேனாக மாறிய கேப்டன் கோஹ்லி

ஆஸ்திரேலியா இந்தியா இடையே நடைபெற்று வரும் இரண்டாவது டெஸ்ட் போட்டியின் விராட் கோஹ்லி பிடித்த கேட்ச் ரசிகர்களால் பெரிதும் பாரட்டப்பட்டு வருகிறது.

இந்தியா ஆஸ்திரேலியா இடையிலான இரண்டாவது டெஸ்ட் போட்டி இன்று (டிசம்பர் 14 ) பெர்த் மைதானத்தில் தொடங்கியது. இப்போட்டியில் டாஸ் வென்ற ஆஸ்திரேலியக் கேப்டன் டிம் பெய்ன் முதலில் பேட்டிங்கை தேர்வு செய்தார்.

நிதானமாக விளையாடிய ஆஸ்திரேலிய அணியில் சீரான இடைவெளியில் விக்கெட்கள் விழுந்த வண்ணம் இருந்தன. போட்டியின் 54 வது ஓவரின் முதல் பந்தை இஷாந்த் வீச அதை எதிர்கொண்ட ஹாண்ட்ஸ்கோம்பின் பேட்டில் பட்ட பந்து ஸ்லிப் திசையில் வேகமாக பறந்தது. முதல் ஸ்லிப்பில் நின்றிருந்த கோஹ்லியின் தலைக்கு மேல் சென்ற பந்தை அனைவரும் ஆச்சர்யப்படும் விதமாக கோஹ்லி அந்தரத்தில் பறந்து கேட்ச் பிடித்து அசத்தினார்.

இதனால் ஹாண்ட்ஸ்கோம்ப் அதிர்ச்சியாகி வெளியேறினார். அற்புதமாக கேட்ச் பிடித்த கோஹ்லியைத் தற்போது டிவிட்டரில் ரசிகர்கள் பாராட்டி வருகின்றனர். கோஹ்லி பிடித்த கேட்சின் வீடியோ டிவிட்டரில் வைரலாகப் பரவி வருகிறது.

கோலியைப் போல ரஹானேவும் ஷான் மார்ஷின் கேட்சை ஸ்லிப்பில் அற்புதமாக பிடித்து அசத்தினார்.