தி.மு.க தலைவர் ஸ்டாலின் சபாநாயகர் மீது நம்பிக்கை இல்லா தீர்மானம் கொண்டு வர திட்டமிட்டு, பிறகு அதை வாபஸ் பெற்றதை அதிமுக அமைச்சர் கிண்டலடித்தது சர்ச்சையை ஏற்படுத்தியுள்ளது.
திமுக தலைவர் ஸ்டாலின் சட்டபேரவை சபாநாயகர் தனபால் மீது நம்பிக்கையில்லா தீர்மானம் கொண்டு வர திட்டமிட்டார். பிறகு தற்போதைய சூழலில் தீர்மானத்தை நிறைவேற்ற வேண்டிய அவசியமில்லை என கைவிட்டார்.
நாகப்பட்டினத்தில் செய்தியாளர்கள் சந்திப்பில் இதுகுறித்து பேசிய அமைச்சர் ஓ.எஸ்.மணியன் “ஸ்டாலின் ஒரு விளையாட்டு பிள்ளை. எதை எப்போது, எப்படி செய்ய வேண்டுமென்று அவருக்கு தெரியாது” என கூறியுள்ளார்.
மேலும் தங்க.தமிழ்செல்வன் திமுகவில் இணைந்தது குறித்து பேசிய மணியன் “திருவிழாவில் திசைமாறி போன பிள்ளைகள் திரும்பி வர வெட்கப்பட்டு திமுகவில் ஒதுங்கியுள்ளன” என பேசியுள்ளார்.
தமிழகத்தின் மிகப்பெரும் கட்சியின் தலைவரை சின்ன பிள்ளை என்று பாவித்து பேசியிருப்பது திமுகவினரிடையே கோபத்தை ஏற்படுத்தியிருப்பதாக கூறப்படுகிறது.