இலங்கையில் சண்டையை நிறுத்தி அரசியல் தீர்வு காண்பதற்கான நடவடிக்கைகளை மத்திய அரசு எடுக்க வேண்டும் என்று வலியுறுத்திக் கேட்டுக் கொண்ட ராமதாஸ், புலிகளை பொறுத்தவரை பயங்கரவாதிகளோ, தீவிரவாதிகளோ அல்ல. அவர்கள் விடுதலைப் போராளிகள். இதனை இந்தியா புரிந்து கொள்ள வேண்டும் என்றார்.
சென்னையில் இன்று செய்தியாளர்களுக்கு பேட்டி அளித்த அவர், இலங்கையில் போரை நிறுத்த நடவடிக்கை எடுக்க வலியுறுத்தி இரண்டு முறை தமிழக சட்டப்பேரவை கூடி தீர்மானம் நிறைவேற்றி மத்திய அரசுக்கு அனுப்பி வைத்தோம். அனைத்துக்கட்சி கூட்டத்தில் தீர்மானம் நிறைவேற்றி அனுப்பினோம். முதலமைச்சர் கருணாநிதி தலைமையில் எல்லோரும் டெல்லிக்குச் சென்று பிரதமரை சந்தித்து வேண்டு கோள் விடுத்தோம். தமிழகத்தை சேர்ந்த அனைத்து நாடாளுமன்ற உறுப்பினர்களும் பிரதமரைச் சந்தித்து முறையிட்டனர். மனிதச் சங்கிலி நடத்தினோம், ஆயினும் மத்திய அரசு மனம் இறங்கவில்லை என்றார்.
இந்த விடயத்தில் தமிழக அரசையும், தமிழக மக்களையும் மத்திய அரசு ஒட்டு மொத்தமாக அவமானப்படுத்தி விட்ட தாகத்தான் கருத வேண்டியிருக்கிறது என்று கூறிய ராமதாஸ், இப்போதும் முதலமைச்சர் கூட்டாக ஒரு நல்ல முடிவை எடுத்து அறிவித்தால் அதனை ஏற்க பா.ம.க தயாராக இருக்கிறது என்றார்.
இலங்கையில் ஒட்டுமொத்த தமிழினமும் அழிய வேண்டும் என்று மத்திய அரசில் உள்ள சில அதிகாரிகள் செயல்படுகிறார்கள் என்று குற்றம்சாற்றிய ராமதாஸ், அதற்கு மத்திய அரசும், அமைச்சர்களும் துணை போகிறார்கள். இலங்கையில் தமிழினம் அழிவதை வேடிக்கை பார்ப்பது கடும் கண்டனத்திற்குரியது என்றார்.
தமிழர்கள் அனைவரும் வெட்கி தலைகுனிந்து நிற்கிறோம். இங்குள்ள தமிழர்களின் சுயமரியாதைக்கும், தன்மானத்திற்கும் மிகப்பெரிய சோதனை ஏற்பட்டு நாம் தலை கவிழ்ந்து நிற்கும் நிலை உருவாகியுள்ளது. எனக்கு கிடைத்த தகவலின் படி இலங்கையில் போரை நிறுத்த வலியுறுத்துவதற்காக இந்தியாவில் இருந்து இலங்கைக்கு பயணிகள் தவிர வேறு யாரும் செல்வதற்கான அறிகுறிகள் இல்லை என்று ராமதாஸ் தெரிவித்தார்.
சீனா, பாகிஸ்தான் நாடுகள் வழங்கிய ஆயுதங்கள், இந்தியா வழங்கிய தொழில்நுட்ப ஆலோசனைகளை வைத்துக் கொண்டு ஓர் ஆண்டாக போராடி கிளிநொச்சியை பிடித்து விட்டோம் என்கிறது இலங்கை அரசு என்று தெரிவித்த ராமதாஸ், அப்படி கிளிநொச்சியை பிடித்தப்போது யார் சரண் அடைந்தார்கள், எத்தனை பேர் சரண் அடைந்தார்கள், கைப்பற்றப்பட்ட ஆயுதங்கள் எவ்வளவு என்பதையெல்லாம் இலங்கை அரசு கூறவில்லை என்றார்.
பாழடைந்த கட்டடத்தை பிடித்துவிட்டு புலிகளின் தலைமையகத்தை பிடித்து விட்டதாக சொல்கிறார்கள். இலங்கை என்றைக்குமே இந்தியாவுக்கு நட்பு நாடாக இருந்ததில்லை. புலிகளை பொறுத்தவரை பயங்கரவாதிகளோ, தீவிரவாதிகளோ அல்ல. அவர்கள் விடுதலைப் போராளிகள். இதனை இந்தியா புரிந்து கொள்ள வேண்டும் என்று ராமதாஸ் கூறினார்.
எனவே இப்போதாவது இலங்கையில் சண்டையை நிறுத்தி அரசியல் தீர்வு காண்பதற்கான நடவடிக்கைகளை மத்திய அரசு எடுக்க வேண்டும் என்று ராமதாஸ் வலியுறுத்திக் கேட்டுக் கொண்டார்.
