ஆளும் திராவிட முன்னேற்றக் கழகத்தின் (தி.மு.க.) தலைவராக முதல்வர் கருணாநிதி 10-வது முறையாக தேர்ந்தெடுக்கப்படுகிறார். கருணாநிதியின் மகனும் கட்சியின் துணைப் பொதுச் செயலாளருமான மு.க.ஸ்டாலின் கட்சியின் புதிய பொருளாளராக தேர்ந்தெடுக்கப்படுகிறார்.
தி.மு.கழகத்தின் 13-வது பொதுத் தேர்தல் கடந்த 6 மாதங்களுக்கும் மேலாக நடந்து வருகிறது. தேர்தலில் வெற்றி பெற்றவர்களின் பட்டியலை தலைமைக்கழகம் வெளியிட்டு வருகிறது.
இந்த நிலையில் சென்னையில் உள்ள அண்ணா அறிவாலயத்தில் வருகிற 27ஆம் தேதி (சனிக்கிழமை) தி.மு.க. பொதுக்குழு கூடுகிறது. இதில் தி.மு.க. தலைவர், பொதுச் செயலாளர், பொருளாளர் ஆகியோருக்கான கட்சியின் உயர்மட்ட பதவிக்கு தேர்தல் நடைபெறுகிறது. இதற்கான மனுதாக்கல் இன்று தொடங்கியது.
தி.மு.க. தலைவர் பதவிக்கு முதல்வர் கருணாநிதி, பொதுச் செயலாளர் பதவிக்கு அமைச்சர் அன்பழகன், பொருளாளர் பதவிக்கு அமைச்சர் மு.க.ஸ்டாலின் ஆகியோரை முன் மொழிந்து தற்போதைய பொருளாளரும் அமைச்சருமான ஆற்காடு வீராசாமி, அமைச்சர்கள் துரைமுருகன், பொன்முடி ஆகியோர் மனுக்களை தி.மு.க அமைப்பு செயலாளர் கல்யாணசுந்தரத்திடம் வழங்கினர்.
கட்சியின் இரண்டு துணை பொதுச் செயலாளர் பதவியில் ஒன்று மகளிருக்கும், மற்றொன்று தலீத் சமூகத்தைச் சேர்ந்தவருக்கும் ஒதுக்கப்பட்டுள்ளது. கட்சியின் தற்போதைய துணை பொதுச் செயலாளராக சற்குண பாண்டியனும், தமிழக செய்தித்துறை அமைச்சர் பரிதி இளம்வழுதியும் உள்ளனர்.
இதில் ஒரு பதவி முதல்வர் கருணாநிதிக்கு நெருக்கமானவரும், மத்திய தொலைத்தொடர்பு மற்றும் தகவல் தொழில்நுட்பத்துறை அமைச்சருமான ஆ. ராசா நியமிக்கப்படலாம் என்று எதிர்பார்க்கப்படுகிறது. மற்றொரு பதவி யாருக்கு என்பது கேள்விக்குறியாக உள்ளது.
இந்த நிலையில், கருணாநிதியின் மற்றொரு மகனான மு.க.அழகிரிக்கு கட்சியில் முக்கிய பொறுப்பு வழங்கப்படுமா? என்ற கேள்வியும் அரசியல் வட்டாரத்தில் எழுந்துள்ளது.
இதற்கு முன்னர் தி.மு.கழகத்தின் பொதுத்தேர்தல் கடந்த 2003ஆம் ஆண்டு நடைபெற்றது. அதில் கட்சியின் தலைவராக மு.கருணாநிதி 9-வது முறை தேர்ந்தெடுக்கப்பட்டார். முதன்முறையாக கட்சியின் பொதுச் செயலாளராக மு.க. ஸ்டாலின் அப்போது தேர்ந்தெடுக்கப்பட்டார். அவர் தி.மு.க. இளைஞரணி தலைவராகவும் உள்ளார்.
இதற்கிடையே, மாறன் சகோதரர்கள் கருணாநிதி குடும்பத்துடன் மீண்டும் இணைந்ததையடுத்து, ஆற்காடு வீராசாமி கட்சியிலிருந்து ஒதுக்கப்படுவதாகவும், அதனால்தான் கட்சியின் பொருளாளர் பதவிக்கு அவரே மு.க. ஸ்டாலினுக்காக மனுத்தாக்கல் செய்துள்ளார் என்றும் கூறப்படுவதை கட்சி நிராகரித்துள்ளது.
தனது வழிகாட்டியும், பகுத்தறிவாதியுமான பெரியார் ஈ.வெ. ராமசாமியுடன் ஏற்பட்ட கருத்து வேறுபாடு காரணமாக திராவிடர் கழகத்திலிருந்து (தி.க.) வெளியேறிய மறைந்த அறிஞர் அண்ணாதுரை கடந்த 1948 ஆம் ஆண்டு திராவிட முன்னேற்றக் கழகம் (தி.மு.க.) என்ற புதியக் கட்சியை நிறுவினார் என்பது குறிப்பிடத்தக்கது.
