மனித நேயம் மேலோங்க உறுதி ஏற்போம்: தலைவர்கள் கிறிஸ்துமஸ் வாழ்த்து
, புதன், 24 டிசம்பர் 2008 (17:19 IST)
சகோதரத்துவமும், மனித நேயமும் மேலோங்க கிறிஸ்துமஸ் பண்டிகையின் போது உறுதி மேற்கொள்வோம் என்று தமிழக அரசியல் தலைவர்கள் கிறிஸ்துமஸ் வாழ்த்து தெரிவித்துள்ளனர்.
தமிழக ஆளுநர் சுர்ஜித் சிங் பர்னாலா : இயேசு பிரான் போதித்த அன்பு, மன்னிப்பு ஆகியவற்றை இந்த நாளில் நினைவுகூர்ந்து உலகில் சமத்துவம், சகோதரத்துவம் நிலவ உறுதி பூணுவோம். அனைவருக்கும் இனிய கிறிஸ்துமஸ் நல்வாழ்த்துக்கள்.
அ.இ.அ.தி.மு.க பொதுச் செயலர் ஜெயலலிதா: உலகத்தை ஆட்கொள்ள வந்த இயேசு பிரானின் பிறந்த நாளை கொண்டாடும் கிறிஸ்துவ பெருமக்கள் அனைவருக்கும் எனது உளங்கனிந்த கிறிஸ்துமஸ் திருநாள் நல்வாழ்த்துகள்.
ம.தி.மு.க. பொதுச் செயலர் வைகோ : சகோதரத்துவமும், மனித நேயமும் மேலோங்க கிறிஸ்துமஸ் பண்டிகையின் போது உறுதி மேற்கொள்வோம்.
தமிழக காங்கிரஸ் தலைவர் கே.வி.தங்கபாலு : இயேசு கிறிஸ்து பிறந்தநாளான இன்று அவர் அறிவுறுத்திய போதனையின்படி வன்முறை ஒழிந்து, அமைதி நல்லிணக்கம் மலர்ந்து மகிழ்ச்சி பெருகிட ஒன்று சேர்ந்து துதிப்போம்.
முன்னாள் மத்திய அமைச்சர் திருநாவுக்கரசர் : அன்பு, பொறுமை, சாந்தி, சமாதானம் உள்ளிட்ட நற்பண்புகளை உலகிற்கு தந்து வாழ்ந்து காட்டிய இயேசு கிறிஸ்துவின் பிறந்தநாளான கிறிஸ்துமஸ் விழாவையொட்டி எனது சார்பிலும், பா.ஜ.க. சார்பிலும் வாழ்த்துக்களை தெரிவித்துக்கொள்கிறேன்.
